ភ្នំពេញ៖ ស្រ្ដីជនជាតិចិនស្រស់ស្អាតបានបើករថយន្ត១គ្រឿងម៉ាកហាយឡែនឌ័រ សង្ស័យស្រវឹងស្រាជោគជាំ ក៏រេចង្កូតទៅបុករបាំងថ្មពុះចែកទ្រួងផ្លូវបណ្ដាលឲ្យទើឡើងទៅលើរបាំងថ្ម តែសំណាងល្អរងរបួសស្រាល ប៉ុន្តែពេលអ្នកសារព័ត៍មានចុះទៅថតយករូបភាព ក៏ត្រូវស្រ្តីបើករថយន្តបង្កនោះ ដោះស្បែកជើងកែងរបស់ខ្លួនដេញវាយគេឯងពេញផ្លូវបង្កឲ្យភ្ញាក់ផ្អើលតែម្តង ។
ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងនៅវេលាម៉ោង១២ និង៤០នាទីរំលងអាធ្រាត្រឈានចូលថ្ងៃទី៨ ខែឧសភា ឆ្នាំ២០១៦ នៅំណុចភ្លើងស្តុបវិទ្យាល័យជា សីុម សន្ធរម៉ុក តាមបណ្ដោយផ្លូវកម្ពុជាក្រោយ(ផ្លូវលេខ១២៨) សង្កាត់ទឹកល្អក់ទី១ ខណ្ឌទួលគោក ។
រថយន្ដបង្កម៉ាកហាយឡែនឌ័រ ពណ៌ស ពាក់ស្លាកលេខភ្នំពេញ2W-0246 បើកបរដោយស្រ្តីជនជាតិចិនម្នាក់ ក្នុងសភាពស្រវឹងស្រា មានវ័យប្រហែលជា៣០ឆ្នាំ ។
តាមប្រភពព័ត៍មានពីសាក្សីនៅកន្លែងកើតហេតុ បានឲ្យដឹងថា នៅមុនេពេលកើតហេតុ គេឃើញរថយន្តបង្កបើកបរដោយស្រ្តីជនជាតិបរទេសម្នាក់ ធ្វើដំណើរក្នុងទិសដៅពីជើងទៅត្បូង តាមផ្លូវមុន្នីរ៉េត លុះបើកមកដល់ស្ដុបសន្ធរម៉ុក ក៏បានបត់ឆ្ពោះទៅខាងលិច រួចជ្រុលទៅបុករបាំងថ្មចែកទ្រូងផ្លូវពេញទំហឹង បណ្ដាលឲ្យទើឡើងទៅលើរបាំងថ្ម តែម្តង ។
ក្រោយកើតហេតុអ្នកសារព័ត៍មានបានទៅថតផ្តិតយករូបភាពនៅកន្លែងកើតហេតុ ស្រាប់តែស្រ្តីជនជាតិចិនដែលបើករថយន្តបង្ក ដែលប្រជាពលរដ្ឋទើបតែជួយសង្ក្រោះចេញពីក្នុងរថយន្តមិនទាន់ស្រួលបួលផងនោះ ក៏បានងាបឈរឡើងរួច ដោះស្បែកជើងកែងដេញវាយគេឯងតែវាយមិនត្រូវ ក៏ត្រូវប្រជាពលរដ្ឋរុញឲ្យដួលខ្លួនឯងវិញ ។
ក្រោយពេលកើតរថយន្ដបង្ក ត្រូវបានសមត្ថកិច្ចស្ទូចយកទៅរក្សាទុកនៅស្នងការដ្ឋានរាជធានីភ្នំពេញ ដើម្បីរង់ចាំការដោះស្រាយតាមនីតិវិធី៕
ដោយ៖ ស ដារ៉ា
...
