ខេត្តកណ្ដាល៖ មុខសញ្ញាចែកចាយគ្រឿងញៀនម្នាក់ត្រូវបានសមត្ថកិច្ចនគរបាលស្រុកខ្សាច់កណ្តាល​ស្រាវជ្រាវបង្រ្កាបចាប់ខ្លួនបាន កាលពីវេលាម៉ោង១៨ និង២០នាទី ថ្ងៃទី១០ ខែឧសភា ឆ្នាំ២០១៦ ស្ថិតក្នុងភូមិលើ ឃុំស្វាយជ្រំ ស្រុកខ្សាច់ក​​ណ្តា​ល បញ្ជូនទៅកាន់អធិការដ្ឋាននគរបាស្រុក ដើម្បីកសាងសំណុំរឿងចាត់ការតាមនីតិវិធីច្បាប់ ។ ក្នុងប្រតិបត្ដិបង្រ្កាបនេះ សមត្ថកិច្ចនគរបាលបានដកហូតថ្នាំញៀនប្រភេទមេតំហ្វេតាមីន ហៅម៉ាទឹកកកចំនួន២កញ្ចប់តូច និងទូរស័ព្ទដៃ១គ្រឿង ។

មន្ត្រីនគរបាលស្រុកខ្សាច់កណ្ដាលបានឲ្យដឹងថា ជនសង្ស័យដែលសមត្ថកិច្ចចាប់ខ្លួនឈ្មោះ  ញ៉ែម វណ្ណី ភេទប្រុស អាយុ២៤ឆ្នាំ មុខរបរកម្មករសំណង់ មានទីលំនៅភូមិព្រែកបង្កង ឃុំព្រែកតាកូវ ស្រុកខ្សាច់កណ្តាល ខេត្តកណ្តាល ។

ប្រភពដដែលបន្ដថា ជនសង្ស័យខាងលើនេះជាមុខសញ្ញាចែកចាយគ្រឿងដែលសមត្ថកិច្ចនគរបាលកំណត់និងតាមដានជាយូរមកហើយ តែកន្លងមកមិនមានវត្ថុតាងដាក់បន្ទុកដើម្បីចាប់ខ្លួន ។ លុះមកដល់ល្ងាចថ្ងៃទី១០ ខែឧសភា ឆ្នាំ២០១៦ សមត្ថកិច្ចទទួលបានព័ត៌មានថា ជនសង្ស័យមានរក្សាទុកគ្រឿងញៀននៅជាប់ខ្លួន ទើបសមត្ថកិច្ចនគរបាលស្រុកចុះសហការជាមួយកម្លាំងប៉ុស្ដិ៍រដ្ឋបាលពួនស្ទាក់ចាប់ខ្លួនជនសង្ស័យដកហូតវត្ថុតាងជាក់ស្ដែង ដើម្បីកសាងសំណុំរឿងចាត់ការតាមនីតិវិធីច្បាប់ ៕

ដោយ៖ ស្អាងជ័យ