ភ្នំពេញ៖ នៅពេលនេះសាលារាជធានីភ្នំពេញ បានរៀបចំក្រុមព័ត៌មាន និងអ្នកនាំពាក្យសាលារាជធានីភ្នំពេញរួចហើយ ដោយកែសម្រួលសមាសភាពមួយចំនួន និងបន្ថែមដល់៥រូប ខណៈដែលពីមុនមានតែ៣រូបនោះ ។ នេះបើតាមការមានប្រសាសន៍ឲ្យដឹងពីលោក មាន ចាន់យ៉ាដា នាយករដ្ឋបាលសាលារាជធានីភ្នំពេញកាលពីព្រឹកថ្ងៃទី១១ ខែឧសភាម្សិលមិញនេះ ។
សមាសភាពក្រុមព័ត៌មាន និងអ្នកនាំពាក្យសាលារាជធានីភ្នំពេញរួមមាន១- លោក ឃួង ស្រេង ជាប្រធាន ១- លោក មាន ចាន់យ៉ាដា សមាជិក ៣- លោក ម៉េត មាសភក្តី សមាជិក ៤-លោក ជិន ប៊ុនធឿន សមាជិក និង ៥- លោក ឈាង ប៊ុនថា សមាជិក ។សមាសភាពកែសម្រួលនេះបានឆ្លង ក្រុមប្រឹក្សាអភិបាលសាលារាជធានីភ្នំពេញ រួចហើយនៅរសៀលម្សិលមិញនេះដោយ រង់ចាំចេញសេចក្តីសម្រេចតែប៉ុណ្ណោះ ហើយសមាសភាពទទួល បន្ទុកព័ត៌មាននេះ គឺធ្វើការជាក្រុម ដោយបែកចែងភារកិច្ចរៀងៗខ្លួន។
ទោះយ៉ាងណាលោក មាន ចាន់យ៉ាដា បានបញ្ជាក់ថា ការកែសម្រួលសមាសភាពនេះធ្វើឡើង បន្ទាប់ លោក ឡុង ឌីម៉ង់ អតីតអ្នកនាំពាក្យសាលរាជធានីភ្នំភេញត្រូវទៅបំពេញ ការងារថី្មជាឯកអគ្គរាជទូតកម្ពុជា ប្រចាំនៅកូរ៉េខាងត្បូងតាមតម្រូវការចាំបាច់របស់រាជរដ្ឋាភិបាល៕
ដោយ៖ ប្រាថ្នា
