ខេត្តកំពង់ឆ្នាំង ៖ បទល្មើសនេសាទខុសច្បាប់ដែលជនសង្ស័យមួយចំនួនប្រើប្រាស់ឧបករណ៍នេសាទក្នុងរដូវហាមឃាត់នៅតែកើតមានជាបន្តបន្ទាប់ ទោះបីកន្លងមកសមត្ថកិច្ចមូលដ្ឋានក៏ដូចជាសមត្ថកិច្ចជំនាញចុះបង្ក្រាបជាញឹកញាប់ក្តី។
ជាក់ស្តែងនៅថ្ងៃទី០៨ ខែសីហា ឆ្នាំ២០២២ កម្លាំងនគរបាលប៉ុស្តិ៍រដ្ឋបាលកំពង់ហៅ និងប៉ុស្តិ៍នគរបាលរដ្ឋបាលច្រណូក នៃអធិការដ្ឋាននគរបាលស្រុកកំពង់លែង បានសហការជាមួយកម្លាំងចម្រុះ សរុបចំនួន៨នាក់ ដឹកនាំដោយលោក ឌុល ចាន់ឌី នាយសង្កាត់រដ្ឋបាលកំពង់លែង បានចុះល្បាត និងបង្ក្រាបបទល្មើសនេសាទ នៅចំណុចអង្គទ្វីប បឹងទីពីរ បឹងទ័ពស្រូវ ក្នុងភូមិសាស្ត្រ ភូមិឯលិច ឃុំច្រណូក ឃុំកំពង់ហៅ ។
មន្ត្រីនគរបាលស្រុកកំពង់លែងបានឱ្យដឹងថា ក្នុងកិច្ចប្រតិបត្តិការខាងលើ សមត្ថកិច្ចចម្រុះបានរើរបាំងស្បៃមុង(សាច់ឈឹប) បានចំនួន០៣កន្លែង ប្រវែង១២៥០ម៉ែត្រ, លបលូស្បៃមុងចំនួន០៨គ្រឿង, បង្គោលចំនួន ២០៣ដើម, លែងកូនត្រីចម្រុះចំនួន១១គីឡូក្រាម ។
រីឯសម្ភារៈវត្ថុតាងជាឧបករណ៍នេសាទខាងលើត្រូវបាន កម្ទេចចោលនៅនឹងកន្លែងទាំងអស់ ៕
ដោយ÷ប្រាថ្នា
