ខេត្ដពោធិ៍សាត់៖ ចោរប្រុស្រី ៤នាក់ក្នុងចំណោមច្រើននាក់ ត្រូវបានសមត្ថកិច្ចអាវុធហត្ថសហការជាមួយកម្លាំងនគរបាលស្រុកក្រគរ ស្ទាក់ចាប់បាន ខណៈពួកគេធ្វើសកម្មភាពបន្លំលួចមាសប្រជាពលរដ្ឋជិត៣ដំឡឹង ។
ហេតុការណ៍សមត្ថកិច្ចសហការគ្នាព័ទ្ធចាប់ក្រុមចោរជាមុខ សញ្ញាចាស់រួមទាំងវត្ថុតាងរថយន្ដ ម៉ូតូ ខាងលើនេះ ប្រព្រឹត្ដឡើងនៅកំណាត់ផ្លូវជាតិលេខ៥ ត្រង់ចំណុចភូមិ.ឃុំស្នាអន្សា ស្រុកក្រគរ ខេត្ដពោធិ៍សាត់ ។
ប្រភពពីសមត្ថកិច្ចស្រុកក្រគរបានឱ្យដឹងថា ជនប្រុស ស្រី ត្រូវឃាត់ខ្លួនខាងលើត្រូវបានគេស្គាល់ ១-ឈ្មោះ ថោង វាសនា ភេទប្រុស អាយុ ១៧ឆ្នាំ អ្នកលក់ការ៉េម នៅក្រុងប៉ោយប៉ែត, ២-ឈ្មោះ ស្រី មុំភេទស្រី អាយុ ៤៣ឆ្នាំ មានទីលំនៅសង្កាត់ផ្សារចាស់ ខ័ណ្ឌដូនពេញ (មានលុយក្នុងខ្លួន ១៧៥០ដុល្លារ និង ៦លានរៀល) ៣-ឈ្មោះ ឈុំ ចិន្ដា ភេទស្រី អាយុ ៥២ឆ្នាំ មានទីលំនៅសង្កាត់ផ្សារថ្មី២ ខ័ណ្ឌដូនពេញ និងទី ៤-ឈ្មោះ ស្រី សំអឿន ភេទប្រុស អាយុ ៤៦ឆ្នាំ មានទីលំនៅសង្កាត់បឹងកក់២ ខ័ណ្ឌទួលគោក រាជធានីភ្នំពេញ(រកឃើញលុយក្នុងខ្លួន ៣៥០ដុល្លារ និង ៩៦ម៉ឺនរៀល) ជាអ្នកបើកបររថយន្ដម៉ាកលុចស៊ីស RX 300 ពណ៌ស ពាក់ស្លាកលេខ ភ្នំពេញ 2P-6201 នៅក្នុងរថយន្ដគេឃើញដាក់ផ្លាកលោហ្គោ អ.ហ, អគ្គបញ្ជាការដ្ឋាន, ក្រសួងការពារជាតិ, និងផ្សេងៗទៀត ។
ប្រភពបន្ដទៀតថា ជនសង្ស័យទាំង ៤នាក់ក្នុងចំណោមច្រើននាក់ខាងលើនេះ បានចូលធ្វើសកម្មភាព នៅតូបរបស់អាជីវករឈ្មោះ ឆឹម សុខ កាលពីវេលាម៉ោង ២និង៣០នាទីរសៀល ថ្ងៃទី ២៤ ខែកក្កដា ឆ្នាំ២០១៥ ដោយប្រើរូបភាពអ្នកខ្លះចូលដូរលុយ អ្នកខ្លះ ចូលទិញអីវ៉ាន់ ធ្វើឱ្យម្ចាស់អាជីវករ វក់វី ហើយឆ្លៀតឱកាសប្រមូលមាស អស់ជិត ៣ដំឡឹង រួចបានបើករថយន្ដគេចខ្លួនមកដល់ចំណុចខាងលើ ត្រូវបានសមត្ថកិច្ចស្ទាក់ចាប់បាន ចំណែករថយន្ដបក្ខពួកគេមួយគ្រឿងទៀត ត្រូវបានបើកគេចខ្លួនតាមបណ្ដោយផ្លូវជាតិលេខ ៥ ទៅទិសខាងលិចបាត់ស្រមោល ៕ ប៉ឹម ពិន
