ខេត្តពោធិ៍សាត់៖ នៅល្ងាចថ្ងៃទី១២ ខែឧសភា ឆ្នាំ២០១៦នេះ តុលាការបានឃុំខ្លួនជនសង្ស័យប្រព្រឹត្តបទល្មើសនេសាទចំនួន៤នាក់ទៀត បន្ទាប់ពីកម្លាំងចម្រុះប្រចាំយាមកាម ការពារ (កន្លែងអភិរក្សជលផលកំពង់ប្រាក់) ចាប់ខ្លួនបញ្ជូនពួកគេមក ខណៈគេនាំគ្នាលួចចូលនេសាទនៅកន្លែងហាមឃាត់។
នាយសង្កាត់រដ្ឋបាលជលផលក្រគរបានឲ្យដឹងថា ជនជាតិវៀតណាមអ្នកនេសាទ ត្រូវបានចាប់ខ្លួនបញ្ជូនឲ្យតុលាកានោះ ទី១-ឈ្មោះ ហុង ហឿន ភេទប្រុស អាយុ ៣៧ ឆ្នាំ (មកពីខេត្តកណ្ដាល) ទី២-ឈ្មោះ ង្វៀង យ៉ាំងហ៊ុង ភេទប្រុស អាយុ ៣៩ឆ្នាំ ទី៣-ឈ្មោះ ប៊ិន ផាន ភេទប្រុស អាយុ៤៥ឆ្នាំ និងទី៤-ឈ្មោះ វ៉ា វាសនា ភេទប្រុស អាយុ២៥ឆ្នាំ ជនសង្ស័យទាំង៤នាក់ស្នាក់នៅភូមិ៥ ឃុំកំពង់លួង ស្រុកក្រគរ ខេត្តពោធិ៍សាត់។ លោក នាយសង្កាត់បន្តថា ជនសង្ស័យត្រូវបានចាប់ជាក់ស្ដែងខណៈពួកគេធ្វើសកម្មភាពនេសាទក្នុងកន្លែងអភិរក្សជលផលកំពង់ប្រាក់។ លោកបន្តទៀតថាក្នុងនោះកម្លាំងដកហូតបានវត្ថុតាងរួមមានៈ កាណូតចំនួន១គ្រឿង អួនអូសដៃចំនួន២វង់ មានប្រវែងចំនួន ១៦០ម៉ែត្រ យកទៅរក្សាទុកនៅស្នាក់ការសង្កាត់រដ្ឋបាលជលផលក្រគរ។
គួររំលឹកផងដែរ ចាប់តាំងពីថ្ងៃទី៩ខែវិច្ឆិកា២០១២ ដល់ខែឧសភា ឆ្នាំ២០១៦ តុលាការបាន សម្រេចឃុំខ្លួនបណ្ដោះអាសន្នអ្នកនេសាទជនជាតិវៀតណាមចំនួន ១៥នាក់ ក្នុងចំណោម ១៩នាក់ ៕
ដោយ៖ ប៉ឹម ពិន