ភ្នំពេញ៖ ប្រជាពលរដ្ឋកំពុងទទូចសុំឲ្យអាជ្ញាធរដែនដីគឺខណ្ឌពោធិ៍សែនជ័យមេត្តាជួយបើកភ្នែកមើល និងពន្លឿនការសង់ស្ពានថ្មីឲ្យបានឆាប់រហ័សផង ព្រោះស្ពានថ្មចាស់ទ្រុឌទ្រោមមួយកន្លែងដែលកំពុងរងការខូចខាតខ្លាំងណាស់ធ្វើឲ្យរថយន្តមិនអាចបើកឆ្លងកាត់បានទេបន្ទាប់ពីមានភ្លៀងមួយតូចសោះទឹកដក់ពេញផ្លូវវាងទៅហើយ។
ស្ពានមួយនេះស្ថិតនៅតាមបណ្តោយផ្លូវលំមួយខ្សែក្នុងភូមិត្រពាំងអារក្ស សង្កាត់ឪឡោក ខណ្ឌពោធិ៍សែនជ័យ ជាប់ព្រំប្រទល់ស្រុកអង្គស្នួល ខេត្តកណ្តាល ផុងដាច់ជាអន្លើៗយូរខែហើយ គ្មានអាជ្ញាធរណាអើពើឡើយ ។
ប្រជាពលរដ្ឋបាននិយាយថា ស្ពានថ្មដែលស្ថិតនៅតាមបណ្តោយផ្លូវលំមួយខ្សែខាងលើនេះចាស់ទ្រុឌទ្រោមបាក់បែកបាក់ផុងចំកណ្តាលស្ពានយូរមកហើយរថយន្តមិនអាចបើកឆ្លងស្ពានបានទេ គឺធ្វើដំណើរឆ្លងកាត់បានតែម៉ូតូនិងអ្នកថ្មើរជើងតែប៉ុណ្ណោះ ។
ប្រជាពលរដ្ឋបន្តថា កន្លងមកនេះលោក ហែម ដារិទ្ធ អភិបាលខណ្ឌពោធិ៍សែនជ័យបានយកគ្រឿងចក្រទៅឈូសឆាយធ្វើផ្លូវវាងក្រោមស្ពានសម្រាប់ឲ្យរថយន្តបើកឆ្លងកាត់បានមួយរយៈប៉ុណ្ណោះ តែអីឡូវនេះគ្រាន់តែមានភ្លៀងធ្លាក់មួយមេតូចសោះបណ្តាលឲ្យមានទឹកដក់និងបែកភក់នៅលើផ្លូវវាងនោះធ្វើឲ្យរថយន្តមិនអាចបើកឆ្លងកាត់ផ្លូវវាងនោះបានទៀតទេ ដូច្នេះប្រជាពលរដ្ឋសំណូមពរសូមឲ្យអាជ្ញាធរពាក់ព័ន្ធ ជាពិសេសលោក ហែម ដារិទ្ធ អភិបាលខណ្ឌពោធិ៍សែនជ័យមេត្តាជួយពន្លឿនការសាងសង់ស្ពានខាងលើនេះឲ្យឆាប់ផង ព្រោះរដូវវស្សាជិតចូលមកដល់ហើយអត់មានផ្លូវវាងសម្រាប់បើកបររថយន្តទៅមកចូលភូមិទេ ៕
ដោយ៖ ប្រាថ្នា