ភ្នំពេញ៖ ក្រុមនិស្សិតសាកលវិទ្យាល័យវិទ្យាសាស្រ្តសុខាភិបាលប្រមាណជាង២០នាក់បានបាត់ទូរស័ព្ទអស់ជាង២០គ្រឿង បន្ទាប់ពីពួកគេចូលប្រឡងស្ថិតនៅសាលាពេទ្យតាមបណ្តោយផ្លូវព្រះមុនីវង្ស សង្កាត់ស្រះចក ខណ្ឌដូនពេញ រាជធានីភ្នំពេញ កាលពីវេលាម៉ោង៤និង២៥នាទីរសៀល ថ្ងៃទី២៦ ខែកក្កដា ឆ្នាំ២០១៥ ។
តាមការរៀបរាប់ពីក្រុមនិស្សិតរងគ្រោះបានបញ្ជាក់ថា នៅវេលាម៉ោងកើតហេតុខាងលើ ខណៈដែលពួកគាត់ចូលទៅប្រឡង ខាងសាលាមិនអនុញ្ញាតឲ្យយកទូរស័ព្ទចូលក្នុងបន្ទប់ប្រឡងឡើយ ទើបពួកគាត់ដាក់ទូរស័ព្ទនៅក្រោមកែបម៉ូតូរៀងៗខ្លួន ។ ប៉ុន្តែនៅពេលពួកគេចេញពីប្រឡង មកវិញ ស្រាប់តែបាត់ទូរស័ព្ទពីកែបម៉ូតូអស់ជាង២០គ្រឿង។
ប្រភពបន្តថា អ្នកទទួលផ្ញើម៉ូតូមិនទទួលខុសត្រូវលើទូរស័ព្ទរបស់ពួកគាត់នោះទេ បើទោះជាពួកគាត់ផ្ញើម៉ូតូនៅកន្លែងបរិវេណស្ថិតក្រោមការឃ្លាំមើលរបស់អ្នកយាមម៉ូតូយ៉ាងណាក៏ដោយ។ ទូរស័ព្ទដែលបាត់ទៅនោះ សុទ្ធតែស៊េរីទំនើប ម៉ាកអាយហ្វូន និងសាំស៊ុង ។
ទាក់ទងករណីនេះ គេសង្ស័យថា អ្នកទទួលផ្ញើម៉ូតូរបស់ក្រុមនិស្សិតខាងលើនេះ ជាបក្ខពួកក្រុមចោរទាំងអស់នោះហើយ ។ ពីព្រោះថា វាមិនដែលនោះទេ មានគេចូលទៅកន្លែងផ្ញើម៉ូតូ ហើយគាស់កែបម៉ូតូលួចទូរស័ព្ទរហូតអស់ជាង២០គ្រឿងបែបនេះ ហេតុអ្វីបានជាអ្នកទទួលផ្ញើម៉ូតូមើលមិនឃើញ ឬមានការសង្ស័យនោះ? ករណីនេះប្រាកដជាចោរខាងក្នុង ឲ្យដៃចោរខាងក្រៅហើយ ។
សមត្ថកិច្ចពាក់ព័ន្ធគួរតែពិនិត្យមើលបញ្ហានេះ ប្រសិនបើមានការប្តឹងផ្តល់ពីក្រុមនិស្សិតដែលបាត់ទូស័ព្ទរហូតជាង២០នាក់ខាងលើនេះ ៕ ស ដារ៉ា
