ភ្នំពេញ៖ រថយន្តកុងតឺន័រមួយគ្រឿងបានបើកបុកម៉ូតូចូលក្រោមកង់រថយន្តតែសំណាងល្អអ្នកបើកម៉ូតូលោតចេញពីម៉ូតូទាន់រងរបួសស្រាល ឯម៉ូតូនៅក្រោមរថយន្តខូចខាតយ៉ាងដំណំ ខណៈកំពុងកកស្ទះចរាចរណ៍។

ហេតុការណ៍នេះកើតឡើងនៅវេលាម៉ោង២ និង២០នាទីរសៀលថ្ងៃទី២៥ ខែឧសភា ឆ្នាំ២០១៦ នៅតាមបណ្តោយផ្លូវជាតិលេខ៣ សង្កាត់ភ្លើងឆេះរទេះ ខណ្ឌពោធិ៍សែនជ័យ។

ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុមានរថយន្តដឹកស៊ីម៉ង់ត៍ក្រុមហ៊ុន ខេស៊ីមែន មួយគ្រឿងបានផ្អៀងកន្ទុយរ៉ឺម៉កចូលប្រឡាយទៅមុខលែងរួចជាហេតុធ្វើឲ្យមានកកស្ទះចរាចរណ៍។ ពេលនោះស្រាប់តែមានរថយន្តកុងតឺន័រមួយគ្រឿងទៀតបានមកដល់មើលទៅមុខមិនឃើញក៏ជ្រុលទៅបុកបុរសម្នាក់កំពុងជិះម៉ូតូបណ្តាលឲ្យម៉ូតូខ្ទាតចូលក្រោមរថយន្តខូចខាតយ៉ាងដំណំ រីឯអ្នកបើកបរលោតចោលម៉ូតូទាន់រងរបួសស្រាល៕

ដោយ៖ សុខាសែនជ័យ