នៅពេលដ៏ខ្លីខាងមុខប្រទេសឥណ្ឌូនេស៊ី និងហ្វីលីពីនមានច្បាប់កាត់ទោសប្រហារជីវិតដល់ឧក្រិត្តជនដើម្បីជាការគម្រាមកំហែងដល់ពលរដ្ឋដទៃទៀតកំឲ្យប្រព្រឹត្តបទល្មើស។
ដោយឡែកនៅក្នុងប្រទេសឥណ្ឌូនេស៊ីជនប្រព្រឹត្តអំពើហិង្សាផ្លូវភេទទៅលើកុមារ នឹងត្រូវប្រឈមនឹងទោសប្រហារជីវិត ។ ច្បាប់ថ្មីនេះត្រូវបានចុះហត្ថលេខាកាលពីថ្ងៃទី២៥ ខែឧសភា ឆ្នាំ២០១៦ ដោយលោកប្រធានាធិបតីឥណ្ឌូនេស៊ី ហ្សូកូ វីដូដូ។ ចំណាត់ការក្តៅរបស់រដ្ឋាភិបាលធ្វើឡើងបន្ទាប់ពីករណីរំលោភ និងសម្លាប់កុមារីម្នាក់នៅកោះស៊ូម៉ាត្រា បានបង្កឲ្យកំហឹងនិងចលនាប្រឆាំងតវ៉ាខ្លាំងនៅឥណ្ឌូណេស៊ី។ ឥណ្ឌូណេស៊ីល្បីខាងអនុវត្តទោសប្រហារជីវិតទៅលើអ្នកជួញដូរគ្រឿងញៀននៅថ្ងៃពុធម្សិលមិញបានបញ្ចេញច្បាប់ថ្មីមួយទៀត ដើម្បីកាត់ទោសប្រហារជីវិតឧក្រិដ្ឋជនដែលរំលោភផ្លូវភេទទៅលើកុមារ។
តាមច្បាប់ថ្មី ទោសប្រហារជីវិតនឹងត្រូវអនុវត្តទៅលើឧក្រិដ្ឋជនដែលបានរំលោភ និងសម្លាប់ ឬបង្ករបួសស្នាមធ្ងន់ធ្ងរ ទៅលើលើរាងកាយ និងបញ្ញាញាណរបស់កុមារ។ ចំណែកឧក្រិដ្ឋជនដែលល្មើសម្តងហើយម្តងទៀត ប្រព្រឹត្តអំពើហិង្សាផ្លូវភេទទៅលើកុមារនឹងត្រូវគេក្រៀវ។ ក្រិត្យថ្មីមានដាក់បញ្ចូលផងដែរការបំពាក់ខ្សែអេឡិចត្រូនិក នៅលើដៃ ឬជើងរបស់ជនរំលោភផ្លូវភេទលើកុមារដែលទើបចេញពីគុក។ ច្បាប់ថ្មីតឹងតែងជាងច្បាប់ចាស់ដែលគ្រាន់តែចែងពីទោសជាប់ពន្ធនាគារយ៉ាងច្រើនបំផុត១៤ឆ្នាំ ទៅលើជនដែលប្រព្រឹត្តបទល្មើសរំលោភផ្លូវភេទ។
ក្រិត្យថ្មីរបស់រដ្ឋាភិបាលត្រូវចូលជាធរមានភ្លាមៗនៅក្រោយការចុះហត្ថលេខារបស់ប្រមុខរដ្ឋាភិបាល ប៉ុន្តែសភាឥណ្ឌូណេស៊ីក៏នៅតែមានសិទ្ធិអាចធ្វើវិសោធនកម្ម ឬបោះឆ្នោតប្រឆាំង។ យ៉ាងណាក៏ដោយច្បាប់ថ្មីរបស់រដ្ឋាភិបាលបានទទួលការគាំទ្រច្រើនពីសាធារណជន និងអ្នកនយោបាយឥណ្ឌូណេស៊ី។ សម្រាប់សមាជិកសភាមកពីគណបក្សអ៊ិស្លាមនិយម វិធានការចាប់ក្រៀវនឹងធ្វើឲ្យជនល្មើសខ្លាចរអា គ្មានគំនិតចង់រំលោភបំពានផ្លូវភេទទៅលើកុមារ។ ប៉ុន្តែ ទាំងសកម្មជន និងអង្គការការពារសិទ្ធិមនុស្សមួយចំនួនមិនសូវយល់ស្របប៉ុន្មាននឹងរដ្ឋាភិបាល ដែលពួកគេចាត់ទុកថា មិនបានយល់ច្បាស់ពីស្ថានភាពជាក់ស្តែង។ សម្រាប់ក្រុមសកម្មជនការពារសិទ្ធិមនុស្ស ទោសប្រហារជីវិតនឹងមិនមែនជាដំណោះស្រាយពិតប្រាកដ ព្រោះវាមិនអាចទប់ស្កាត់ដោយប្រសិទ្ធិភាពការរំលោភបំពានផ្លូវភេទទៅលើកុមារនោះទេ។
ចំណែកនៅក្នុងប្រទេសហ្វីលីពីនវិញ លោក ឌុយទែរតេ ដែលទើបតែជាប់ឆ្នោតបានបន្តទម្លាយឲ្យដឹងនូវវិធានការមួយចំនួន ពិសេសទាក់ទងនឹងការបង្រ្កាបឧក្រិដ្ឋជន និងសំណុំរឿងសមុទ្រចិនខាងត្បូងដែលហ្វីលីពីនកំពុងប្រឈមមុខនឹងចិន។
មិនមែនជាយុទ្ធនាការក្នុងនាមជាបេក្ខជនប្រធានាធិបតីទេ តែជាយុទ្ធនាការក្នុងនាមជាប្រធានាធិបតីដែលទើបជាប់ឆ្នោត និងដែលត្រូវចូលអង្គុយកៅអីប្រធានាធិបតីនៅថ្ងៃទី៣០ ខែមិថុនា ខាងមុខ។ នៅក្នុងសន្និសីទកាសែតលើកទី១ នាថ្ងៃទី១៥ ខែឧសភា លោករ៉ូឌ្រីហ្គូ ឌុយទែរតេបានបង្ហើបឲ្យដឹងនូវវិធានការសំខាន់ចំនួនពីរ ទី១ វិធានការបង្រ្កាបបទឧក្រិដ្ឋកម្ម និងទី២ វិធានការស្វែងរកដំណោះស្រាយជាមួយចិននៅក្នុងជម្លោះសមុទ្រចិនខាងត្បូង។
នៅក្នុងវិធានការបង្រ្កាបបទឧក្រិដ្ឋកម្មត្រូវបានលោក ឌុយទែរតេ បញ្ជាក់ថា លោកនឹងប្រើកណ្តាប់ដៃដែកប្រឆាំងនឹងឧក្រិដ្ឋជន ពិសេសការរត់ពន្ធគ្រឿងញៀន ការចាប់រំលោភ លួចប្លន់ និងឃាតកម្ម។ នៅក្នុងន័យនេះ លោកឌុយទែរតេ បានទម្លាយឲ្យដឹងពីបំណងចង់អនុវត្តន៍ឡើងវិញនូវទោសប្រហារជីវិតដែលហ្វីលីពីនបានបោះបង់ចោលក្នុងឆ្នាំ ២០០៦។ នៅក្នុងការប្រហារជីវិតឧក្រិដ្ឋជនទៀតសោត លោកឌុយទែរតេ ចង់ឲ្យព្យួរ.កជាជាងប្រើកាំភ្លើងបាញ់ដើម្បីសន្សំសំចៃគ្រាប់កាំភ្លើង៕
ប្រែសម្រួល៖ សាធី
