ភ្នំពេញ ៖ ក្នុងរយៈពេលពេញមួយថ្ងៃ នៃថ្ងៃទី០២ ខែធ្នូ ឆ្នាំ២០២២នេះ កម្លាំងសមត្ថកិច្ចជំនាញ នៃនាយកដ្ឋាននគរបាលព្រហ្មទណ្ឌក្រសួងមហាផ្ទៃ បានបើកប្រតិបត្តិការស្រាវជ្រាវជាច្រេីនថ្ងៃ តាមចាប់ឃាត់ខ្លួនជនសង្ស័យប្រុសស្រីចំនួន០៧នាក់ជាបន្តបន្ទាប់ ដែលពាក់ព័ន្ធនឹងករណីកាច់កម៉ូតូ និងប្លន់ប្រដាប់ដោយអាវុធ ក្នុងភូមិសាស្ត្ររាជធានីភ្នំពេញ។
ក្នុងប្រតិបត្តិការខាងលើនេះបានធ្វើឡើង ដោយមានការដឹកនាំកម្លាំង និងបញ្ជារផ្ទាល់ ដោយលោក ឧត្តមសេនីយ៍ទោ ជាវ វិបុល អនុប្រធាននាយកដ្ឋាននគរបាលព្រហ្មទណ្ឌ នៃក្រសួងមហាផ្ទៃ ដោយដឹកនាំសហការជាមួយកម្លាំងខណ្ឌពោធិ៍សែនជ័យ ខណ្ឌមានជ័យ និងខណ្ឌដង្កោ។ សម្រាប់ជាលទ្ធិផលបណ្តោះអាសន្ន សមត្ថកិច្ចឃាត់ខ្លួនជនសង្ស័យសរុបចំនួន៧នាក់ ស្រីម្នាក់ និងបានដកហូតម៉ូតូជាច្រើនគ្រឿង និងរថយន្ត Prius មួយគ្រឿង រួមទាំងវត្ថុតាងពាក់ព័ន្ធមួយចំនួន។
មន្ត្រីសមត្ថកិច្ចជំនាញដែលចុះប្រតិបត្តិការណ៍ខាងលេីនេះបានបង្ហេីបប្រាប់ឲ្យដឹងថា ក្រុមជនសង្ស័យទាំងនេះ គឺជាក្រុមជំនាញ និងសកម្មបំផុត ក្នុងការធ្វើសកម្មភាព លួចឆក់ប្លន់ នៅក្នុងភូមិសាស្ត្ររាជធានីភ្នំពេញ។
បច្ចុប្បន្ននេះ ក្រុមជនសង្ស័យខាងលើ ត្រូវបានបញ្ចូនខ្លួនបន្តទៅកាន់នាយកដ្ឋាននគរបាលព្រហ្មទណ្ឌ នៃក្រសួងមហាផ្ទៃ ដើម្បីសាកសួរនាំបន្តនីតិវិធី ៕ ដោយ៖ ភារ៉ា ដង្កោ
