ខេត្តព្រះសីហនុ៖ លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន នៅព្រឹកថ្ងៃសៅរ៍ទី០៣ ខែធ្នូ ឆ្នាំ២០២២នេះ បានឱ្យដឹងថា៖ ធនធានសមុទ្រគឺជាមូលដ្ឋានសំខាន់នៃសន្តិសុខស្បៀង និងជំរុញកំណើនសេដ្ឋកិច្ចរបស់កម្ពុជា។
លោករដ្ឋលេខាធិការ បានឱ្យដឹងទៀតថា ទិដ្ឋភាពបាតសមុទ្រកោះរ៉ុងសន្លឹម ខេត្តព្រះសីហនុ! ព្រះរាជាណាចក្រកម្ពុជាឆ្នេរសមុទ្ររហូតដល់ ៤៤០គីឡូម៉ែត្រ ដែលជាឆ្នេរសមុទ្រដ៏ស្រស់ស្អាតលាតសន្ធឹងលើខេត្តចំនួន ៤ រួមមានខេត្តកំពត កែប ព្រះសីហនុ និងកោះកុង។
មន្រ្តីជាន់ខ្ពស់រូបនេះ បានបញ្ជាក់បន្ថែមថា នៅបាតសមុទ្រកម្ពុជា មានធនធានធម្មជាតិយ៉ាងច្រើនសន្ធឹកសន្ធាប់ មានមច្ឆជាតិគ្រប់ប្រភេទ ស្មៅ ផ្កាថ្មចម្រុះ។
សូមជម្រាបដែរថា កាលពីម្សិលមិញនេះ លោក នេត្រ ភក្ត្រា ក៏សូមអរអរសាទរចំពោះក្រុមស្រាវជ្រាវជីវៈចម្រុះបាតសមុទ្ររបស់ កម្មវិធីអភិរក្សតំបន់ឆ្នេរនិងសមុទ្រ ដែលបានបញ្ចប់កិច្ចការស្រាវជ្រាវនៅបាតសមុទ្រនៅប្រជុំកោះពូលូវ៉ៃ ប្រកបដោយជោគជ័យ ដែលមានការសហការពីក្រុមហ៊ុនខ្មែរដាយគ្រុប ខូដារដាយវឺ និង មូលនិធិកោះសង្សារ! យោងតាមក្រុមការងារស្រាវជ្រាវជីវៈចម្រុះបាតសមុទ្រ នេះជាលើកទី២ ក្នុងឆ្នាំ២០២២ ដែលក្រុមស្រាវជ្រាវនេះ បានធ្វើការស្រាវជ្រាវជីវៈចម្រុះបាតសមុទ្រនៅទីតាំងកោះពូលូវ៉ៃនេះ ហើយក៏ជាក្រុមការងារដំបូងគេដែរបានធ្វើការស្រាវជ្រាវនេះផងដែរ។
កិច្ចការស្រាវជ្រាវនេះធ្វើឡើងដើម្បីវាយតម្លៃសក្តានុពល និងសុខភាពប្រព័ន្ធអេកូឡូស៊ី និងជីវៈចម្រុះបាតសមុទ្រ។ ក្រុមការងារ ក៏សូមថ្លែងអំណរគុណយ៉ាងជ្រាលជ្រៅចំពោះលោកមេបញ្ជារការប្រចាំកោះពូលូវៃដែលបានជួយសម្រួលឱ្យការងាររបស់ក្រុមការងារស្រាវជ្រាវជីវៈចម្រុះបាតសមុទ្រ ប្រព្រឹត្តទៅដោយរលូន។
គួរបញ្ជាក់ថា ប្រជុំកោះពូលូវ៉ៃ នៃព្រះរាជាណាចក្រកម្ពុជា ពោរពេញដោយសក្តានុពល មានជីវៈចម្រុះសម្បូរបែប ប្រភេទផ្កាដ៏ស្រស់ស្អាត និងស្រស់បំព្រង។ ការថែររក្សាជម្រកផ្កាថ្មប៉ប្រះទឹក គឺមានសារសំខាន់បំផុតសម្រាប់សេដ្ឋកិច្ចជាតិ និងប្រជានេសាទក្នុងតំបន់។ ជាមួយគ្នាផងដែរ ការលុបបំបាត់នូវវិធីនេសាទដែលគ្មាននិរន្តរភាព និងបំផ្លាញជម្រកផ្កាថ្មប៉ប្រះទឹក ពិតជាសំខាន់បំផុត ដើម្បីធានាបានសុខភាពសមុទ្រ កំណើនផលនេសាទ និងសក្តានុពលទេសចរណ៍៕
ដោយ៖សហការី
