ភ្នំពេញ​៖ យុវជន៣នាក់ជិះម៉ូតូមួយគ្រឿងឌុបគ្នាក្នុងល្បឿនលឿនមិនប្រយ័ត្នជ្រុលបុករថយន្ដមួយគ្រឿងម៉ាកឡិចសីុស៤៧០កំពុងបត់ឆ្លងផ្លូវពេញទំហឹងបណ្ដោយឲ្យម៉ូតូនិងមនុស្សផ្លោងនិងអូសជាង១០ម៉ែត្ររងបួសធ្ងន់ស្រា៣នាក់ ហើយត្រូវបានរថយន្តសង្គ្រោះដឹកយកទៅសង្គ្រោះនៅមន្ទីពេទ្យភ្លាមៗ។ ​

ហេតុការណ៍​គ្រោះថ្នាក់​ចរាចរណ៍​នេះ​បាន​កើត​ឡើង​នៅ​វេលា​ម៉ោង​៣ និង០០នាទីទាបភ្លឺថ្ងៃទី​២​ ខែមិថុនា​ ឆ្នាំ​២០១៦​ នៅចំណុចផ្លូវព្រះសីុសុវត្ថិកែងផ្លូវលេខ​៨៨ ស្ថិតក្នុងសង្កាត់​ស្រះចក​ ខណ្ឌដូនពេញ​ រាជធានីភ្នំពេញ​។ ​

ប្រភពព័ត៌មានពីកន្លែងកើតហេតុបានឲ្យដឹងថានៅមុនពេលកើតហេតុគេបានឃើញរថយន្ដម៉ាកឡិចសីុសRX៤៧០ ពណ៌ស្ករ ពាក់ស្លាកលេខ​ ភ្នំពេញ​2P-4589 ធ្វើដំណើរតាមបណ្ដោយផ្លូវព្រះសីុសុវត្ថិទិសដៅពីត្បូងទៅជើងហើយបានបត់ឆ្វេងឆ្លងផ្លូវបំណងចូលទៅផ្លូវលេខ៨៨។ ពេលដែលកំពុងបត់ស្រាប់តែមានម៉ូតូមួយគ្រឿងម៉ាកហុងដាឌ្រីមC125​ ពណ៌ខ្មៅ​ ពាក់ស្លាកលេខ​ភ្នំពេញ​ 1FF-9123​ ជិះដោយយុវជន៣នាក់ក្នុងល្បឿនលឿនធ្វើដំណើរបញ្ច្រាស់ទិសគ្នាបុកចំក្បាលរថយន្ដចំហៀងខាងឆ្វេងពេញទំហឹងបណ្ដាលឲ្យម៉ូតូនិងមនុស្សផ្លោងនិងអូសជាង១០ម៉ែត្ររងរបួសធ្ងន់ទាំង៣នាក់។ ​

ប្រភពបានបន្តថាក្រោយពីកើតហេតុម្ចាស់រថយន្ដបានឈប់នៅកន្លែងកើតហេតុដោយមិនបានរត់គេចនោះទេ​ ចំណែកអ្នករងរបួសត្រូវបានរថយន្ដសង្គ្រោះដឹកយកទៅសង្គ្រោះនៅមន្ទីរពេទ្យ​ រីឯម៉ូតូនិងរថយន្ដសមត្ថកិច្ចបានធ្វើការវាស់វែងយកទៅរក្សាទុកនៅការិយាល័យចរាចរណ៍រាជធានីភ្នំពេញដើម្បីរងចាំដោះស្រាយនៅពេលក្រោយ៕

ដោយ៖  ព្រែកជ័យ