អឺរ៉ុបចំណាយប្រហែល១ពាន់ពាន់លានដុល្លារបន្ថែមទៀតដោយសារតែការកើនឡើងយ៉ាងខ្លាំងនៃតម្លៃថាមពលចាប់តាំងពីសង្រ្គាមនៅអ៊ុយក្រែន ហើយវិបត្តិត្រូវបានគេជឿថាទើបតែចាប់ផ្តើមនោះទេ។

បន្ទាប់ពីរដូវរងានេះ តំបន់អ៊ឺរ៉ុបនឹងត្រូវបំពេញទុនបម្រុងឧស្ម័នដែលស្ទើរតែគ្មានការផ្គត់ផ្គង់ពីរុស្ស៊ី។ ឧស្ម័នធម្មជាតិរាវ (LNG) នៅលើទីផ្សារពិភពលោកត្រូវបានគេរំពឹងថានឹងនៅខ្វះខាតរហូតដល់ឆ្នាំ២០២៦ នៅពេលដែលក្រុមហ៊ុននាំចេញដូចជាសហរដ្ឋអាមេរិក និងកាតារអាចចាប់ផ្តើមបង្កើនផលិតកម្ម។
សារព័ត៌មាន Bloomberg កាលពីថ្ងៃទី១៩ ខែធ្នូបានផ្សាយតាមទិន្នន័យទីផ្សារថា អ្នកប្រើប្រាស់និងអាជីវកម្មនៅអឺរ៉ុបបានបង់ប្រាក់បន្ថែមចំនួន១ពាន់ពាន់លានដុល្លារដោយសារតែតម្លៃថាមពលកើនឡើងចាប់តាំងពីការផ្ទុះឡើងនៃអរិភាពនៅក្នុងប្រទេសអ៊ុយក្រែន។ យោងតាមទីភ្នាក់ងារប្រឹក្សាយោបល់ Bruegel ដែលមានមូលដ្ឋាននៅទីក្រុងប្រ៊ុចសែល ប្រទេសបែលហ្សុិក រដ្ឋាភិបាលអឺរ៉ុបបានចំណាយប្រាក់ជាង៧០០ពាន់លានដុល្លារគាំទ្រដល់អាជីវកម្ម និងប្រជាជនដើម្បីទូទាត់សងសម្រាប់ការខាតបង់នៅពេលដែលតម្លៃថាមពលកើនឡើង ប៉ុន្តែស្ថានភាពនេះត្រូវបានព្យាករថានឹងមានរយៈពេលជាច្រើនឆ្នាំ។
លោក Martin Devenish នាយកក្រុមហ៊ុនប្រឹក្សា S-RM បាននិយាយថា “ប្រសិនបើប្រទេសនានានៅតែបន្តធ្វើដូចគ្នា វានឹងជាចំនួនទឹកប្រាក់ដែលមិនអាចនឹកស្មានដល់។ សមត្ថភាពហិរញ្ញវត្ថុនៃប្រទេសអ៊ឺរ៉ុបក៏កំពុងប្រឈមមុខនឹងសម្ពាធផងដែរ នេះបើយោងតាម Bloomberg ។ ប្រហែលពាក់កណ្តាលនៃសមាជិកសហភាពអឺរ៉ុប (EU) ត្រូវបានគេនិយាយថាកំពុងជាប់ជំពាក់បំណុលលើសពីដែនកំណត់ GDP 60% របស់ក្រុមនេះ។
កាលពីថ្ងៃទី១៩ ខែធ្នូ រដ្ឋមន្ត្រីថាមពលរបស់សហភាពអឺរ៉ុបបានបញ្ចប់ការចរចាលើយន្តការកែតម្រូវទីផ្សារ ដែលផ្តោតលើការកំណត់ការកើនឡើងតម្លៃឧស្ម័នច្រើនពេកនៅក្នុងប្រទេសសមាជិក។ សហភាពអឺរ៉ុបក៏បានអនុម័តសំណើបន្ទាន់ចំនួនពីរដើម្បីប្រយុទ្ធប្រឆាំងនឹងតម្លៃថាមពលខ្ពស់ និងធានាការផ្គត់ផ្គង់ថាមពលនៅពេលប្រឈមមុខនឹងការខ្វះខាត រួមទាំងការទិញឧស្ម័នរួមគ្នា និងការសម្រួលនីតិវិធីដើម្បីអនុញ្ញាតឱ្យពន្លឿនការដាក់ពង្រាយថាមពលកកើតឡើងវិញ ។
ចាប់តាំងពីការផ្ទុះឡើងនៃជម្លោះនៅអ៊ុយក្រែន សហភាពអឺរ៉ុបបានប្តេជ្ញាកាត់បន្ថយការពឹងផ្អែកលើថាមពលរបស់រុស្ស៊ី។ ទីក្រុងមូស្គូបានកាត់បន្ថយឬបញ្ឈប់ទាំងស្រុងនូវលំហូរឧស្ម័នតាមរយៈបំពង់បង្ហូរប្រេងទៅកាន់អឺរ៉ុប ដោយបង្វែរការផ្គត់ផ្គង់ប្រេងទៅកាន់បណ្តាប្រទេសអាស៊ីវិញ។
ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានព្រមានថា ប្រសិនបើអ្នកប្រើប្រាស់លោកខាងលិចចង់ងាកចេញពីថាមពលរុស្ស៊ី ទីក្រុងមូស្គូនឹងនាំចេញទៅកាន់ប្រទេសដែលមានសេដ្ឋកិច្ចសំខាន់ៗនៅភាគខាងកើត ដូចជាឥណ្ឌា និងចិន៕ ដោយធីរីណា

រូប​ថត​ :​ Reuters