ភ្នំពេញ៖ ជនសង្ស័យម្នាក់គាស់ផ្ទះបំណងចូលលួចរបស់របបរមានតម្លៃ តែម្ចាស់ទាន់ប្តឹងប៉ូលិសឲ្យឃាត់ខ្លួនតែម្តងធ្វើឲ្យមានការភ្ញាក់ផ្អើលដល់ប្រជាពលរដ្ឋរស់នៅក្បែរនោះដេញស្ទាក់ចាប់បាន។ ករណីនេះបានកើតឡើងកាលពីវេលាម៉ោង៧ព្រឹកថ្ងៃទី៣ ខែមិថុនាឆ្នាំ២០១៦ តាមបណ្តោយផ្លូវរថភ្លើង ស្ថិតក្នុងសង្កាត់ទួលសង្កែ ខណ្ឌប្ញស្សីកែវ ។

ជនសង្ស័យមានឈ្មោះហេង សិនសំភេទ ប្រុសអាយុ២៧ឆ្នាំមុខរបរជាងឈើ ស្នាក់នៅផ្ទះជួលភូមិសាមគ្គីសង្កាត់ឫស្សីកែវ ។ រីឯម្ទាស់ផ្ទះឈ្មោះស៊ុយ សឿង ភេទស្រី អាយុ១៧ឆ្នាំមុខរបរកាត់ដេររោងច្រក ស្នាក់នៅភូមិសាមគ្គីសង្កាត់ឫស្សីកែវ ខណ្ឌឫស្សីកែវ។

តាមសាក្សីពីកន្លែងកើតហេតុបានឲ្យដឹងថា មុនពេលកើតហេតុគេមិនដឹងថា ជនសង្ស័យគាស់ទ្វារផ្ទះចូលសម្ងំរុះរើអីវ៉ាន់ពេញបន្ទប់ តែរកមិនឃើញរបស់របបរមានតម្លៃ ក៏ត្រូវម្ចាស់មកទាន់ស្រែកផ្អើលឆោរឡោ និងប្រជាពលរដ្ឋជិតនោះនាំគ្នាដេញចាប់ប្រគល់ឲ្យសមត្ថកិច្ច ។

ក្រោយពីដឹងថាចោរគាស់ផ្ទះជនរងគ្រោះបានទៅដាក់ពាក្យបណ្ដឹងនៅប៉ុស្ដិ៍នគរបាលរដ្ឋបាលទួលសង្កែ ហើយសមត្ថកិច្ចតាមចាប់ជនសង្ស័យ និងកសាងសំណុំរឿងសាកសួរបញ្ជូនមកអធិការខណ្ឌឫស្សីកែវដើម្បីផ្ដន្ទាទោសតាមផ្លូវច្បាប់៕

ដោយ៖ អរុណរះ