ខេត្តកណ្តាល៖ ភ្លៀងមួយមេយ៉ាងធំលាយឡំទៅដោយខ្យល់កន្ត្រាក់បោកបក់បណ្តាលឲ្យរលំ​របង​សង្ក័សី និងដើមឈើសង្កត់លើបុរស-ស្ត្រី២នាក់កំពុងជិះម៉ូតូ បណ្តាលឲ្យរងរបួសយ៉ាងធ្ងន់ធ្ងរ កាលពីវេលាម៉ោង១និង១០នាទី រសៀលថ្ងៃទី០៣ ខែមិថុនា ឆ្នាំ២០១៦ ស្ថិតក្នុងភូមិត្រពាំងក្រឡាញ់ ឃុំសំរោងលើ និងភូមិត្រពាំងសុព័រ ឃុំឆក់ឈើនាង ស្រុកអង្គស្នួល ខេត្តកណ្តាល ។

មន្ត្រីនគរបាលស្រុកអង្គស្នួលបានឲ្យដឹងថា ជនរងគ្រោះ២នាក់ដែលរងរបួសក្នុងហេតុ​ការណ៍​​គ្រោះធម្មជាតិខាងលើនេះទី១-ឈ្មោះ យ៉ាន់ រឿង ភេទស្រី អាយុ៦៧ឆ្នាំ ជនជាតិខ្មែរ មុខរបរ កសិករ (រងរបួសបែកក្បាលផ្នែកខាងក្រោយ) និងទី២-ឈ្មោះ កុយ រីម ភេទប្រុស អាយុ៣៧ឆ្នាំ ជនជាតិខ្មែរ មុខរបរ កសិករ ។ ជនរងគ្រោះទាំង២នាក់មានទីលំនៅក្នុង​ភូមិត្រពាំងអណ្តូង ឃុំសំរោងលើ ស្រុកអង្គស្នួល ។ ហេតុការណ៍នេះដែរបានធ្វើឲ្យ​ខូចខាត​របងសង្ក័សីហ៊ំព័ទ្ធរណ្តៅដីរបស់ឧកញ៉ា តាក់ ជីឡៅ ស្ថិតក្នុងភូមិត្រពាំងសុព័រ ឃុំឆក់ឈើនាង ស្រុកអង្គស្នួល ប្រវែង៥០ម៉ែត្រ និងដើមកាស្យាមួយដើម ស្ថិតក្នុងភូមិត្រពាំងក្រឡាញ់ ឃុំ​សំរោង​លើ ស្រុកអង្គស្នួល ។

ប្រភពដដែលបានបន្តថា នៅមុនពេលកើតហេតុនៅក្នុងភូមិសាស្ត្រឃុំទាំង២ខាង​លើ​នេះ​មានភ្លៀងធ្លាក់មួយមេយ៉ាងធំលាយឡំទៅដោយខ្យល់កន្ត្រាក់បោកបក់ធ្វើឲ្យដើមកាស្យា​មួយដើមរលំទៅលើផ្លូវសង្កត់ពីលើជនរងគ្រោះកំពុងជិះម៉ូតូ បណ្តាលឲ្យរងរបួសយ៉ាងធ្ងន់ធ្ងរ។ ដោយឡែករបងសង្ក័សីហ៊ំព័ទ្ធរណ្តៅដីរបស់ឧកញ៉ា តាក់ ជីឡៅ ស្ថិតក្នុងភូមិត្រពាំងសុព័រ ឃុំឆក់ឈើនាង ស្រុកអង្គស្នួល ក៏ត្រូវខ្យល់បក់បោកឲ្យរលំផងដែរ ៕

ដោយ៖ ស្អាងជ័យ