ភ្នំពេញ៖ បុរសនារី២នាក់ជិះម៉ូតូCLickមួយគ្រឿងឆ្លងផ្លូវមិនប្រយ័ត្នត្រូវម៉ូតូឌ្រីមសង់C125ដែលធ្វើដំណើរបញ្ច្រាស់ទិសគ្នាបុកពេញទំហឹងបណ្ដាលឲ្យរងរបួសធ្ងន់និងស្រាល៣នាក់ត្រូវបញ្ជូនទៅសង្គ្រោះនៅមន្ទីរពេទ្យភ្លាមៗ។
ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង១០ និង៣០នាទីយប់ថ្ងៃទី៥ ខែមិថុនា ឆ្នាំ២០១៦ នៅចំណុចផ្លូវលេខ១០៦ កែងមហាវិថីព្រះនរោត្តម ស្ថិតក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ។
ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញបុរសនារី២នាក់ជិះម៉ូតូមួយគ្រឿងម៉ាកហុងដាឌ្រីមសង់C125ពណ៌ខ្មៅ ពាក់ស្លាកលេខ ភ្នំពេញ1FF-8828 ធ្វើដំណើរតាមបណ្ដោយមហាវិថីព្រះនរោត្តមទិសដៅពីជើងទៅត្បូងក្នុងល្បឿនលឿន។ ពេលមកដល់ចំណុចកើតហេតុក៏មានម៉ូតូមួយគ្រឿងផ្សេងទៀតម៉ាកClick ពណ៌ស-ក្រហម ពាក់ស្លាកលេខ ភ្នំពេញ1FO9222 ជិះដោយបុរសនារី២នាក់ធ្វើដំណើរបញ្ច្រាស់ទិសគ្នាហើយបានបត់ឆ្វេងឆ្លងផ្លូវក៏ជ្រុលបុកគ្នាពេញទំហឹងបណ្ដាលឲ្យរងរបួសធ្ងន់២នាក់និងស្រាលម្នាក់ ចំណែកម៉ូតូទាំង២គ្រឿងរងការខូចខាត។
ក្រោយកើតហេតុអ្នករងរបួសទាំង៣នាក់ត្រូវបានបញ្ជូនទៅសង្គ្រោះនៅមន្ទីរពេទ្យ រីឯម៉ូតូទាំង២គ្រឿងសមត្ថកិច្ចជំនាញចុះធ្វើការវាស់វែងយកទៅរក្សាទុកនៅការិយាល័យចរាចរណ៍រាជធានីភ្នំពេញដើម្បីរងចាំដោះស្រាយនៅពេលក្រោយ៕
ដោយ៖ ព្រែកជ័យ
