ភ្នំពេញ៖ ជនសង្ស័យជួញដូរគ្រឿងញៀនម្នាក់រួមនិងថ្នាំញៀនចំនួន២០កញ្ចប់ និងទូហ្គេម៧ទូ ត្រូវបានកម្លាំងគណៈកម្មការចម្រុះចុះបង្ក្រាបនិងឃាត់ខ្លួនបាននៅក្នុងបន្ទប់ជួលមុខពេទ្យលោកសង្ឃ កាលពីម៉ោង១៧ និង៣០នាទីល្ងាចថ្ងៃទី៦ ខែមិថុនា ឆ្នាំ២០១៦ នៅក្រុម១០ ភូមិត្រពាំងឈូក សង្កាត់ទឹកថ្លា ខណ្ឌសែនសុខ។
ក្នុងប្រតិបត្តការណ៍ចុះបង្ក្រាបនេះដឹកនាំដោយលោកវរៈសេនីយ៍ទោ សារី បុត្រសត្យា នាយការិយាល័យជួញដូរគ្រឿងញៀនរាជធានីភ្នំពេញ និងមានការសម្របសម្រួលពីលោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញព្រមទាំសមត្ថកិច្ចមូលដ្ឋានចូលរួមមួយចំនួនផងដែរ។
ជនសង្ស័យជួញដូរគ្រឿងញៀននោះឈ្មោះ ឡូ រិទ្ធ ភេទប្រុស អាយុ១៩ឆ្នាំ មុខរបរមិនពិតប្រាកដ ស្នាក់នៅចំណុចកើតខាងលើ និងមានស្រុកកំណើតភូមិស្តារលើ ឃុំព្រះរាម ស្រុកថ្មពួក ខេត្តបន្ទាយមានជ័យ។
ក្នុងប្រតិបត្តការណ៍ចុះបង្ក្រាបខាងលើនេះសមត្ថកិច្ចបានចាប់យកថ្នាំញៀនប្រភេទក្រាមសថ្លា២០កញ្ចប់ថង់តូច ទូហ្គេមវាយពង់ចំនួន៧ទូ ក្នុងនោះទូហ្គេមបាញ់ត្រី១ទូ ហើយសមត្ថកិច្ចបានបិទផ្ទះធ្វើអាជីវកម្មខាងលើចំនួន៦ផ្ទះផងដែរ។
បច្ចុប្បន្នជនសង្ស័យនិងថ្នាំញៀន២០កញ្ចប់ត្រូវបានបញ្ជូនទៅការិយាល័យប្រឆាំងគ្រឿងញៀនរាជធានីភ្នំពេញ ដោយឡែកទូហ្គេមទាំង៧ទូយកទៅរក្សាទុកនៅសាលាខណ្ឌសែនសុខ ដើម្បីធ្វើការវាយកមេ្ទចចោលនៅពេលក្រោយ៕
ដោយ៖ តុង សីហា
