ភ្នំពេញ : នៅថ្ងៃទី២៣ ខែកុម្ភៈ ឆ្នាំ២០២៣ នៅទីស្តីការក្រសួងទេសចរណ៍ លោក ថោង រដ្ឋសក្តិ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ បានដឹកនាំកិច្ចប្រជុំក្រុមការងារបច្ចេកទេសដោយផ្ទាល់ និងតាមប្រព័ន្ធវីដេអូរ ជាមួយលោកស្រី Dee Sovimol នាយកប្រតិបត្តិការិយាល័យសម្របសម្រួលទេសចរណ៍មេគង្គ (MTCO) និងតំណាងធនាគារអភិវឌ្ឃន៍អាស៊ី (ADB) ដើម្បីពិភាក្សាលើបច្ចុប្បន្នភាពការត្រៀមរៀបចំធ្វើជាម្ចាស់ផ្ទះវេទិការទេសចរណ៍មេគង្គ ឆ្នាំ២០២៣ (Mekong Tourism Forum 2023) និងកិច្ចប្រជុំក្រុមការងារទេសចរណ៍ប្រទេសមហាអនុតំបន់មេគង្គ (51st GMS Tourism Working Group) ដែលនឹងប្រព្រឹត្តចាប់ពីថ្ងៃទី២៤ ដល់២៨ ខែមេសា ឆ្នាំ២០២៣ នៅសណ្ឋាគារ Independent Hotel ខេត្តព្រះសីហនុ។

តាមរយៈកិច្ចពិភាក្សា អង្គប្រជុំទទួលបានលទ្ធផលដូចខាងក្រោម៖
១. បានឯកភាពលើរបៀបវារៈចុងក្រោយសម្រាប់កិច្ចប្រជុំក្រុមការងារទេសចរណ៍ប្រទេសមហាអនុតំបន់មេគង្គ កិច្ចប្រជុំក្រុមការងារគម្រោង ADB និងកិច្ចប្រជុំក្រុមប្រឹក្សាការិយាល័យទេសចរណ៍មេគង្គ (MTCO Board’s Meeting) ដែលនឹងប្រព្រឹត្តិទៅនៅថ្ងៃទី២៥ ខែមេសា ឆ្នាំ២០២៣ និងបានពិនិត្យ និងផ្តល់យោបល់បន្ថែមលើសេចក្តីព្រាងកម្មវិធីវេទិការទេសចរណ៍មេគង្គ ឆ្នាំ២០២៣ នៅថ្ងៃទី២៦ ខែមេសា ឆ្នាំ២០២៣ ដោយបានបញ្ចូលវាគ្មិនជាតិ និងអន្តរជាតិសំខាន់ៗដើម្បីពិភាក្សាលើប្រធានបទទេសចរណ៍សំខាន់ ដោយផ្តោតលើបច្ចេកវិទ្យាថ្មីៗ ការលើកកម្ពស់សមភាពយេនឌ័រ និងការអភិវឌ្ឍន៍ធនធានមនុស្សក្នុងវិស័យទេសចរណ៍។
២. អង្គប្រជុំបានឯកភាពគ្នាលើយន្តការនៃការផ្សព្វផ្សាយវេទិកាទេសចរណ៍មេគង្គ ឆ្នាំ២០២៣ ដោយបានរៀបចំបង្កើតគេហទំព័រសម្រាប់ផ្សព្វផ្សាយ និងចុះឈ្មោះអ្នកចូលរួម តាមរយៈ https://mekongtourism.org/program-cambodia/ ការរៀបចំបដាផ្សព្វផ្សាយដោយផ្ទាល់ និងតាមប្រព័ន្ធអនឡាញ ការរៀបចំប្លង់គោលទីតាំង និងការរចនាសម្ភារៈផ្សព្វផ្សាយសំខាន់នានា។
៣. បានពិភាក្សាលម្អិតលើពិធីការនៃការរៀបចំកម្មវិធី ហូបចុក ពិព័រណ៌ទេសចរណ៍ ការត្រៀមទទួលស្វាគមន៍ និងដឹកជញ្ជូនប្រតិភូអន្តរជាតិ វាគ្មិន អ្នកសម្របស្រួល អ្នកសារព័ត៌មានអន្តរជាតិ និងវិស័យឯកជន ដែលមកចូលរួមកម្មវិធីខាងលើ និងការរៀបចំសណ្ឋាគារផ្លូវការសម្រាប់ពិធី និងសណ្ឋាគារដៃគូរសម្រាប់ការស្នាក់នៅរបស់ប្រតិភូ។
៤. បានពិភាក្សាលើការរៀបចំធនធានមនុស្សដើម្បីគាំទ្រដំណើរការរៀបចំកម្មវិធីដោយបានពិនិត្យលើសេចក្តីព្រាងសេចក្តីសម្រេចបង្កើតអនុគណៈកម្មការពាក់ព័ន្ធ និងលេខាធិការដ្ឋាន សំដៅធានាប្រសិទ្ធភាព និងផលិតភាពនៃការរៀបចំកម្មវិធីឲ្យបានល្អប្រសើរ៕

ដោយ : សហការី