ខេត្តស្វាយរៀង៖ យុវជនម្នាក់បានបែកក្បាលធ្លាយខួរស្លាប់ភ្លានៗនៅនិងកន្លែងកើតហេតុដោយសារករណីគ្រោះថ្នាក់ចរាចរណ៍គួរឲ្យរន្ធត់មួយបានកើតឡើងលើកំណាក់ផ្លូវជាតិលេខ១បន្ទាប់ពីជិះម៉ូតូ១គ្រឿង ហើយត្រូវរថយន្តបើកស្របទិសគ្នាបុកពីក្រោយយ៉ាងពេញទំហឹងកាលពីវេលាម៉ោង១០និង៥០នាទីព្រឹកថ្ងៃទី១៣ ខែមិថុនា ឆ្នាំ២០១៦ ស្ថិតក្នុងភូមិស្វាយតឿ សង្កាត់ស្វាយតឿ ក្រុងស្វាយរៀង។

សមត្ថកិច្ចនគរបាលក្រុងស្វាយរៀងបានឲ្យដឹងថា យុវជនដែលស្លាប់មានឈ្មោះ ខៀវ សុជា អាយុ១៩ឆ្នាំ រស់នៅភូមិបុសមនលើ ឃុំបុសមន ស្រុករំដួល ខេត្តស្វាយរៀង ខណៈបើកបរម៉ូតូម៉ាកហុងដាសេ១២៥ ពណ៌ខ្មៅ ពាក់ស្លាកលេខស្វាយរៀង 1C-2994 ខូចខាតយ៉ាងដំណំ។

រីឯអ្នកបើករថយន្តមានឈ្មោះ សំ សារិ ភេទប្រុស អាយុ៣៧ឆ្នាំ នៅភូមិត្រពាំងផ្លុង សង្កាត់បាទី ក្រុងបាវិត ខេត្តស្វាយរៀងក្រោយពេលបង្កហេតុបានបើករថយន្តគេចខ្លួនរហូតជិតវត្តតាសួសស្រុកស្វាុយជ្រំ ទើបសមត្ថកិច្ចស្ទាក់ឃាត់ខ្លួនបាន។

បើតាមសាក្សីបានឲ្យដឹងថា មុនពេលកើតហេតុមានម៉ូតូម៉ាកហុងដាសេ១២៥ ពណ៌ខ្មៅ១គ្រឿងបើកបរដោយយុវជនម្នាក់លើកំណាត់ផ្លូវជាតិលេខ១ក្នុងទិសដៅពីកើតមកលិចក្នុងល្បឿនលឿនហើយមិនដឹងយ៉ាងម៉េចស្រាប់តែប៉ះដៃចង្កូតចូលរថយន្តម៉ាកសាំយ៉ុង១៥កៅអី ពណ៌ស ពាក់ស្លាកលេខភ្នពេញ 2AE-5548 ទិសដៅស្របគ្នាពីកើតមកលិចកិនចំក្បាលបែកផ្ទុះធ្លាយខួរស្លាប់ភ្លាមៗតែម្ដង។

ក្រោយពេលកើតហេតុប្រជាពលរដ្ឋរាយការណ៍មកសមត្ថកិច្ចមូលដ្ឋានមកអន្តាគមន៍ធ្វើការស្ទាក់រថយន្តរហូតមកដល់ស្រុកស្វាយជ្រំ ទើបឃាត់បានបញ្ជូនមកការិយាល័យនគរបាលចរាចរណ៍ខេត្តស្វាយរៀងដោយស្រាយតាមនីតិវិធី។

បច្ចុប្បន្នសពត្រូវបាននគរបាលប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណី៕

ដោយ៖ យឹមសុថាន