ក្លិបសេះបង្កង់ Juventus បានទិញខ្សែ បម្រើអន្តរជាតិបូស្នៀ Miralem Pjanic ដោយជោគជ័យ ពីក្រុម Romaដែលជាគូប្រជែងធំរបស់ខ្លួននៅក្នុងក្របខ័ណ្ឌអីុតាលី Serie A ។

កីឡាករវ័យ២៦ឆ្នាំរូបនេះបានសម្រេចចិត្តចុះហត្ថលេខាលើកិច្ចសន្យារយៈពេល៥ឆ្នាំមកលេងនៅក្នុងក្រុមជើងឯកអីុតាលីក្នុងតម្លៃខ្លួន២៥,៤លានផោន។ គាត់បាន ផ្លាស់ចេញពីក្រុម Lyon របស់បារាំងមក កាន់ Roma កាលពីឆ្នាំ២០១១ ។

Miralem Pjanicស៊ុតបាល់បាន១០គ្រាប់ក្នុងការបង្ហាញខ្លួន៣៣ប្រកួតឲ្យក្រុម Romaកាលពីរដូវកាលមុនហើយជួយឲ្យក្រុមនេះឈរលំដាប់លេខ៣មាន១១ពិន្ទុពីក្រោយក្រុម Juventus។
ខ្សែបម្រើMiralem Pjanicបានសម្តែងក្តីសង្ឃឹមថានឹងអាចនាំយកជោគជ័យបន្ថែមទៀតដល់ក្លិបសេះបង្កង់ក្រោយពេលចុះ កិច្ចសន្យារួច ។

គាត់បាននិយាយថា “ខ្ញុំរីករាយណាស់ដែលបានមកដល់ក្លិបJuventusនិងអាចចូលរួមយកជោគជ័យទាំងអស់ គ្នា។ ខ្ញុំមានអារម្មណ៍អស្ចារ្យណាស់ហើយសង្ឃឹមថានឹងអាចស៊ុតបាល់បញ្ចូលទីបានច្រើននៅទីនេះ៕

ដោយ៖ ដេវីត