ខេត្តព្រះសីហនុ៖ យុវជន ២នាក់ត្រូវបានរថយន្តសង្គ្រោះដឹកបញ្ជូនមកកាន់គ្លីនិចភ្លាមៗដោយសាររងរបួសធ្ងន់បន្ទាប់ពីត្រូវបានរថយន្តម៉ាក ស៊ីណា បុកពេញទំហឹងកាលពីវេលាម៉ោង៩និង៣៥នាទីយប់ថ្ងៃទី១៤ ខែមិថុនាឆ្នាំ២០១៦ នៅចំនុចចំណោតលោកយាយម៉ៅ ស្ថិតក្នុងភូមិ១ សង្កាត់លេខ១ ក្រុងព្រះសីហនុ។
យោងតាមប្រភពពីសមត្ថកិច្ចចរាចរណ៍បានឲ្យដឹងថា នៅមុនកើតហេតុគេឃើញមានម៉ូតូ១គ្រឿងម៉ាក វ៉េវ សេ១២៥ ពណ៌ខៀវ គ្មានស្លាកលេខ បើកបរដោយឈ្មោះ ស៊ន ប៊ុនធឿន ភេទប្រុស អាយុ២១ឆ្នាំ មានទីលំនៅភូមិ៣សង្កាត់លេខ១ ក្រុងព្រះសីហនុ រងរបួសធ្ងន់ បាក់ជើងស្តាំ និងអ្នករួមដំណើរជាមានឈ្មោះ សុទ្ឋ ផៃ ភេទប្រុស អាយុ២៣ឆ្នាំ មានទីលំនៅភូមិ៣ សង្កាត់លេខ១ ក្រុងព្រះសីហនុ បានប៉ះគ្នាជាមួយរថយន្ត១គ្រឿងម៉ាក ស៊ីណា ពណ៌ស្ក ពាក់ស្លាកលេខ ព្រះសីហនុ 2AG-7336 បើកបរដោយឈ្មោះ CHONG PAK JIT ភេទប្រុស អាយុ៤៨ឆ្នាំជនជាតិម៉ាឡេស៊ី មានទីលំនៅរាជធានីភ្នំពេញ បង្កឲ្យម៉ូតូ និងរថយន្តខូចខាតមធ្យម។
តាមសាក្សីនៅក្បែរកន្លែងកើតហេតុបានអះអាងថា នៅមុនពេលកើតហេតុគេបានឃើញរថយន្ត១គ្រឿងបើកក្នុងទិសដៅពីកើតទៅលិច ប៉ុន្តែមកដល់ចំនុចផ្លូវចំណោទខ្លាំង ហើយងងឹតនិងក្នុងស្ថានភាពល្បឿនលឿន ទើបធ្វើឲ្យភាគីម៉ូតូចាប់ហ្វ្រាំងមិនទាន់ទើបជ្រុលទៅបុករថយន្តចំផ្នែកខាងឆ្វេងនៃមុខរថយន្តបោកខ្ទប់ទៅនឹងកញ្ចក់រថយន្តសន្លប់ស្តូកស្តឹទាំង ២នាក់រងរបួសធ្ងន់ ហើយត្រូវបានរថយន្តសង្គ្រោះគ្លីនិចឯកជន រស្មីកំពង់សោម ដឹកយកទៅសង្គ្រោះភ្លាមៗផងដែរ។
ក្រោយកើតហេតុទាំងម៉ូតូនិងរថយន្តត្រូវបានសមត្ថកិច្ចចរាចរណ៍យកទៅរក្សាទុកនៅការិយាល័យចរាចរណ៍ផ្លូវគោកខេត្តរងចាំការដោះស្រាយនៅពេលក្រោយ៕
ដោយ៖ ឆ្លាមសមុទ្រ
