ពលរដ្ឋរស់នៅក្នុងទីក្រុង Manbij ក្នុងប្រទេសស៊ីរីបានព្យាយាមចាកចេញពីទីនោះដោយប្រថុយនិងគ្រោះថ្នាក់គ្រប់ជំហ៊ាន។ ទីក្រុងនោះស្ថិតក្រោមការគ្រប់គ្រងរបស់ក្រុម IS ។ ការចាកចេញរបស់ពលរដ្ឋដោយខ្លាចរងការវាយប្រហារពីប្រទេសលោកខាងលិចទៅលើក្រុម IS ដែលបន្លំខ្លួនជាមួយប្រជាពលរដ្ឋ។ ក្នុងរយៈពេលកន្លងមកពលរដ្ឋប្រមាណជា ៦០០នាក់បានរត់គេចខ្លួនរួចនិងចេញផុតពីក្រុង Manbij ។
ប្រជាជនស៊ីរីប្រមាណជា ៦០០នាក់ បានសម្រេចជោគជ័យក្នុងការរត់ភៀសខ្លួនចេញផុតពីក្រញាំដៃរបស់ពួកជីហាត ដែលកំពុងក្តោបក្តាប់នៅក្រុង Manbij ។ ឆ្លៀតឱកាសនៅពេលដែលពួកអ៊ីស្លាមជីហាតមានភាពធូរលុងពុំសូវមានភាពប្រុងប្រយ័ត្នប្រជាជនទាំងអស់នោះបាននាំគ្នារត់ភៀសខ្លួនចេញតាមច្រកនៅភាគខាងត្បូងក្រុងពីព្រោះនៅទីនោះពុំមានការវាយប្រយុទ្ធគ្នាដ៏ខ្លាំងខ្លាដូចជានៅភាគខាងជើងនិងខាងកើតក្រុង Manbij ទេ នេះជាការជូនដំណឹងរបស់អង្គការឃ្លាំមើលសិទ្ធមនុស្សនៅក្នុងប្រទេសស៊ីរី (OSDH)។ ក្រុមយុទ្ធជនអារ៉ាប់-គួដ នៃកងកម្លាំងប្រជាធិបតេយ្យស៊ីរី(FDS) ដែលគាំទ្រដោយទីក្រុងវ៉ាស៊ីតោន បានទទួលស្វាគមន៍ជួយដល់ប្រជាជនស៊ីរីទាំងនោះដែលបានភៀសខ្លួនរួចផុតពីក្រញាំដៃដែករបស់ពួកជីហាត។
ក៏ប៉ុន្តែ យោងតាមអង្គការឃ្លាំមើលសិទ្ធិមនុស្សដដែល «ចំនួនប្រជាជន ៦០០នាក់នេះ ក៏នៅតែជាចំនួនមួយដ៏ស្តួចស្តើងបំផុត បើប្រៀបធៀបទៅនឹងចំនួនប្រជាជនរាប់សិបពាន់នាក់ ដែលកំពុងជាប់ក្នុងសំណាញ់របស់ពួកទមិឡជីហាតនៅក្រុង Manbij ។ ម្យ៉ាងទៀតពួកទមិឡទាំងនោះ ក៏មិនញញើតឡើយក្នុងការយកជីវិតប្រជាជនខ្សត់ខ្សោយមកធ្វើជាខែលសម្រាប់ការពារពួកវាទៀតផង។ ហេតុនេះហើយបានជាយន្តហោះរបស់កងសម្ព័ន្ធមិត្តអន្តរជាតិមានការស្ទាក់ស្ទើរក្នុងការទម្លាក់គ្រាប់បែកទៅលើក្រុងនោះដោយខា្លចមានប្រជាជនស្លាប់ច្រើន។
នៅខណៈនេះយុទ្ធជនអារ៉ាប់-គួដ បានបែរទិសចៀសក្រុង Manbij ដើម្បីសំដៅការវាយប្រហារទៅទិសខាងលិចវិញ ហើយពួកគេកំពុងតែស្ថិតនៅចម្ងាយមិនដល់១៨គីឡូម៉ែត្រផងពីក្រុង Al-Bab ដែលជាដែនជម្រកការពារដ៏ចំណាស់បំផុតរបស់អង្គការរដ្ឋអ៊ិស្លាមនៅស៊ីរី ។ ក្រុង Al-Bab ស្ថិតនៅចម្ងាយតែ៤០គីឡូម៉ែត្រភាគខាងលិចនៃក្រុង Manbij ដែលបានធ្លាក់ទៅក្នុងកណ្តាប់ដៃរបស់ពួកជីហាតនៅឆ្នាំ២០០៣។
នៅភាគខាងលិចដដែលក្នុងខេត្តអាឡិបដែលត្រួតត្រាដោយដោយក្រុមរណសិរ្ស alNosra សាខាមួយរបស់អៃកៃដានៅស៊ីរី ប្រជាជនស៊ីវិលយ៉ាងហោច ២០នាក់ត្រូវបានស្លាប់នៅក្នុងការវាយឆ្មក់តាមអាកាសរបស់កងសម្ព័ន្ធមិត្តប្រឆាំងទៅលើទីផ្សារមួយ៕
ប្រែសម្រួល៖ សាធី
