ភ្នំពេញ៖ គូសង្សារមួយគូបើករថយន្ដឡិចសីុសRX330មួយគ្រឿងឡើងលើស្ពានជ្រោយចង្វាចាស់រេចង្កូតទៅបុកបង្កាន់ដៃស្ពានបណ្ដាលឲ្យរងការខូចខាតនិងរថយន្ដដាច់កាឡេទៅមុខលែងរួច តែមិនបណ្ដាលឲ្យមានអ្នករងរបួសនោះទេ។

ករណីគ្រោះថ្នាក់ចរាចរណ៍នេះបានកើតឡើងនៅវេលាម៉ោង២  និង៤៥នាទី រំលងអាធ្រាត្រឈានចូលថ្ងៃទី១៦ ខែមិថុនា ឆ្នាំ២០១៦ នៅលើស្ពានជ្រោយចង្វា ស្ថិតក្នុងសង្កាត់ ស្រះចក ខណ្ឌដូនពេញ រាជធានីភ្នំពេញ។

ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញរថយន្ដបង្កម៉ាកឡិចសីុសRX330 ពណ៌ស ពាក់ស្លាកលេខ ភ្នំពេញ2AJ-1008 បើកបរដោយគូសង្សារមួយគូ ធ្វើដំណើរឡើងស្ពានជ្រោយចង្វាចាស់ទិសដៅពីលិចទៅកើត ពេលមកដល់ចំណុចកើតហេតុរថយន្ដបានរេចង្កូតទៅខាងឆ្វេងដៃជ្រុលទៅបុករនាំងបង្កាន់ដៃស្ពានបណ្ដាលឲ្យរងការខូចខាត ចំណែករថយន្ដដាច់កាឡេខាងមុខផ្នែកខាងឆ្វេងនិងអូសប្រហែល២០ម៉ែត្រទើបទៅមុខលែងរួច។

ប្រភពបានបន្តថា ក្រោយពីកើតហេតុម្ចាស់រថយន្ដមិនបានរត់គេចខ្លួនទៅណានោះទេ ក្រោយមកម្លាំងសមត្ថកិច្ចមូលដ្ឋានបានចុះដល់កន្លែងកើតហេតុនិងបានសហការណ៍ជាមួយកម្លាំងជំនាញចុះធ្វើការវាស់វែងស្ទួចយករថយន្ដបង្កទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ ដើម្បីរងចាំដោះស្រាយតាមនីតិវិធីច្បាប់៕

ដោយ៖ ព្រែកជ័យ