ភ្នំពេញ៖ បុរសម្នាក់បើករថយន្ដឡិចសីុសRX300មួយគ្រឿងក្នុងល្បឿលឿនមិនប្រយ័ត្នជ្រុលទៅបុកគូទរថយន្ដកាមរីហាយប្រ៊ីតពីក្រោយពេញហើយបន្តទៅបុករនាំងដែកពុះចែកទ្រូងផ្លូវបណ្ដាលឲ្យបាក់អស់ចំនួន៤ផ្ទាំងនិងរថយន្ដរងការខូចខាតទៅមុខលែងរួច។

ហេតុការណ៍នេះបានកើតឡើងនៅវេលាម៉ោង១១ និង១០នាទីយប់ថ្ងៃទី១៥ ខែមិថុនា ឆ្នាំ២០១៦ តាមបណ្ដោយមហាវិថីព្រះមុន្នីវង្ស នៅចំណុចខាងមុខភោជនីដ្ឋាន ប៉ោកី ស្ថិតក្នុងសង្កាត់ បឹងកេងកងទី១ ខណ្ឌចំការមន រាជធានីភ្នំពេញ។

ប្រភពព័ត៌មានជុះវិញកន្លែងកើតហេតុបានឲ្យដឹងថា នៅមុនពេលកើតហេតុមានរថយន្ដកាមរីហាយប្រ៊ីត ពណ៌ស គ្មានស្លាកលេខ ធ្វើដំណើរតាមបណ្ដោយមហាវិថីព្រះមុន្នីវង្ស ទិសដៅពីត្បូងទៅជើង លុះមកដល់ចំណុចកើតហេតុក៏មានរថយន្ដមួយគ្រឿងទៀតម៉ាកឡិចសីុសRX300 ពណ៌ស ពាក់ស្លាកលេខភ្នុំពេញ2AH-4532 បើកបរដោយបុរសម្នាក់ធ្វើដំណើរស្របទិសគ្នា បើកក្នុងល្បឿនយ៉ាងលឿនជ្រុលទៅបុកគូថរថយន្ដកាមរីហាយប្រ៊ីតពេញទំហឹងបណ្ដាលរងការខូចខាត ហើយរថយន្ដនៅមិនទាន់អស់ល្បឿនរេចង្កូតបន្តទៅបុករនាំងដែកពុះចែកទ្រូងផ្លូវបាក់អស់ចំនួន៤ផ្ទាំងទើបទៅមុខលែងរួច។

ក្រោយកើតហេតុម្ចាស់រថយន្ដបង្កបានចុះពីរថយន្ដបម្រុងគេចខ្លួនតែត្រូវប្រជាពលរដ្ឋដែលនៅជិតកន្លែងកើតហេតុចាប់ឃាត់ខ្លួនប្រគល់ឲ្យសមត្ថកិច្ច។

ក្រោយមកកម្លាំងជំនាញបានចុះធ្វើការវាស់វែងយករថយន្ដទាំង២គ្រឿងយកទៅរក្សាទុកនៅការិយាល័យចរាចរណ៍រាជធានីភ្នំពេញ ដើម្បីរងចាំដោះស្រាយតាមនីតិវិធីច្បាប់៕

ដោយ៖ ជីម ភារ៉ាដង្កោ