ខេត្តកំពង់ធំ : បុរសដែលបាញ់សម្លាប់ ប្រពន្ធ ម្តាយក្មេកនិងប្អូនថ្លៃនៅខេត្តកំពង់ធំបានធ្វើអត្តឃាតបាញ់សម្លាប់ខ្លួនឯងនៅមុខផ្នូរដូនតា!!! នេះបើយោងតាមការបញ្ជាក់ឱ្យដឹងពីលោក ឃួន ងួន ស្នងការរងនគរបាលខេត្តកំពង់ធំទទួលផែនព្រហ្មទណ្ឌកម្រិតស្រាលបានប្រាប់ឱ្យអង្គភាពមជ្ឈមណ្ឌលព័ត៌មាន” នគរវត្ត” បានដឹងនៅរសៀលថ្ងៃទី២៨ ខែមីនា ឆ្នាំ២០២៣នេះ។

     លោកបន្តថា ជនសង្ស័យជាឃាតក មុនបាញ់សម្លាប់ខ្លួនឯង ហើយបានសរសេរនូវពាក្យជាច្រើន រួចក៏បាញ់នៅកន្លែងផ្នូរជីដូនជីតាសាច់ញាតិរបស់ខ្លួន នៅវេលាម៉ោងប្រមាណជាង 8 ព្រឹកថ្ងៃទី 28 ខែមីនា ឆ្នាំ២០២៣។ 

    សូមបញ្ជាក់ថា ព្រោះតែសម្ពាធផ្លូវចិត្ត ធ្ងន់ធ្ងរពេក បុរសម្នាក់បានបាញ់សម្លាប់ខ្លួនបន្ទាប់ពីបានប្រព្រឹត្តអំពើឃាតកម្មនៅយប់ថ្ងៃទី២៧ ខែមីនា ឆ្នាំ២០២៣ វេលាម៉ោង២០និង២០នាទី នៅផ្ទះជនរងគ្រោះ ក្នុងភូមិដំរីងាប់ ឃុំអណ្តូងពោធិ៍ ស្រុកតាំងគោក ខេត្តកំពង់ធំ  ។

    ជនសង្ស័យឈ្មោះ ទឺម សុវណ្ណធារិទ្ធ ភេទប្រុស អាយុ២៩ឆ្នាំ មានស្រុកកំណេីតនៅខេត្តសៀមរាប បច្ចុប្បន្នរស់នៅភ្នុំពេញ ផ្លូវលេខ២០០៤ បុរីសឡា មុខរបរជាងចាក់សាក់ និងស្រោបបន្តោងព្រះ បានធ្វេីសកម្មភាពយកកាំភ្លើងបាញ់ក្រុមគ្រួសារ ជនរងគ្រោះដែលកំពុងអង្គុយលេងជុំគ្នា នៅក្រោមផ្ទះ ។

    ជនរងគ្រោះមាន១-ឈ្មោះ សួស ផាត ភេទស្រី អាយុ៥៦ឆ្នាំ ២-ឈ្មោះ ហៀង សុធីន ភេទប្រុស អាយុ១០ឆ្នាំ និង៣-ឈ្មោះ ហៀង រតនា ភេទស្រី អាយុ ១៨ឆ្នាំ ត្រូវជា ប្រពន្ធជនសង្ស័យ។

    ឃាតកបានសរសេរមុនពេលបាញ់សម្លាប់ខ្លួន ដោយសមត្ថកិច្ចបានឃើញនៅវេលាម៉ោង​១០ព្រឹកថ្ងៃទី២៨​ ខែមីនា​ ឆ្នាំ​២០២៣នេះ​បន្ថែម​ថា៖​ លោកប៉ាអ្នកម៉ាក់កូនស្រលាញ់អ្នកទាំង2ខ្លាំងណាស់រួមទាំងបងប្អូនទាំងអស់ ពេលនេះកូនបានមកដល់ផ្នូរម៉ានិងកុងនៅសានគរហើយ កូនចង់នៅទីនេះជាមួយគាត់ អោយកូនសុំទោសអ្នកទាំង2និងបងប្អូនទាំងអស់គ្នាផង ប៉ាម៉ាក់កុំខឹងនឹងកូនអី កូនពិបាកទទួលយកណាស់ហេតុអ្វីបានជាគេមកបំបែកបំបាក់កូនបែបនេះទៅវិញ ប៉ាម៉ាក់សូមអ្នកទាំងពីរកុំកើតទុក្ខអីកូនសុំខមាទោសអ្នកទាំង2និងបងប្អូនទាំងអស់ពីចម្ងាយផង បងអូរ បងក្ដី អាតូច អាហេង មីអូនជួយមើលថែលោកប៉ាអ្នកម៉ាក់ផងខ្ញុំហត់ហើយ ខ្ញុំចង់សម្រាក សូមអ្នកទាំងអស់គ្នាកុំជេរខ្ញុំអី អ្នកមិនមែនខ្ញុំអ្នកមិនដឹងនោះទេ ថាវាពិបាកទទួលយកខ្លាំងប៉ុនណា អាហេងវីដេអូមេរៀនស្រោបប្លាស្ទិកដែលបងឆាតអោយរៀនប្រឹងប្រែងរៀនអោយចេះ ហើយយកចិត្តទុកដាក់អោយល្អផង ត្រូវព្យាយាមធ្វើអោយស្អាតដូចបង បងជួយបានត្រឹមហ្នឹងបងលាហើយ ជាចុងក្រោយសូមលោកប៉ាអ្នកម៉ាក់និងបងប្អូនទាំងអស់ជួយកប់ខ្ញុំអោយនៅជាមួយម៉ានិងកុងនៅទីនេះផងចុះ មិនចាំបាច់ធ្វើបុណ្យទេកុំអោយអស់លុយព្រោះខ្ញុំជាមិនបានការ ពេលនេះខ្ញុំបានក្លាយជាឃាតកសម្លាប់មនុស្សហើយ ច្បាប់គេមិនលើកលែងអោយខ្ញុំទេ៕

 

ដោយ : សិលា – ស តារា