ភ្នំពេញ៖ សមត្ថកិច្ចខណ្ឌ៧មករាកំពុងល្បាតក៏ស្រាប់តែប្រទះឃើញជនសង្ស័យ២នាក់ទើបតែគាស់ផ្ទះលួចរូបចំឡាក់បាន ក៏ត្រូវសមត្ថកិច្ចខណ្ឌ៧មករាដេញតាមចាប់ជនសង្ស័យម្នាក់ ចំណែកជនសង្ស័យម្នាក់ទៀរត់គេចខ្លួនបាត់ស្រមោល។
ហេតុការណ៍នេះកើតឡើង កាលពីវេលាម៉ោង៣ និង៣០នាទីយប់រំលងអធ្រាត្រ ឈានចូលថ្ងៃទី១៧ ខែមិថុនា ឆ្នាំ២០១៦ ស្ថិតត្រង់ចំណុចមុខផ្ទះលេខ២៦៦AEo ក្រុម៦ ភូមិ១ តាមបណ្ដោយផ្លូវលេខ១០៧ ក្នុងសង្កាត់បឹងព្រលិត ខណ្ឌ៧មករា រាជធានីភ្នំពេញ។
ជនសង្ស័យមានឈ្មោះ អ៊ូរ មករា ភេទប្រុស អាយុ២១ឆ្នាំ មុខរបរមិនពិតប្រាកដ ស្នាក់នៅម្ដុំស្ទឹងមានជ័យ។
បើតាមសម្ដីពីសមត្ថកិច្ចបានប្រាប់ឲ្យដឹងថា មុនពេលកើតហេតុកម្លាំងសមត្ថកិច្ចខណ្ឌ៧មករាកំពុងល្បាតនៅក្នុងមូលដ្ឋានរបស់ខ្លួន ក៏ស្រាប់តែឃើញជនសង្ស័យ២នាក់ជិះម៉ូតូមួយគ្រឿងម៉ាកសងកូរ៉េ ពណ៌ក្រហម គ្មានស្លាកលេខ ហើយនៅក្នុងដៃមានកាន់រូបចំឡាក់ទៀតផង ធ្វើឱ្យសមត្ថកិច្ចឃើញដូចនេះក៏មានការសង្ស័យ ហើយក៏បានជិះម៉ូតូប្រដេញតាមពីក្រោយ ភ្លាមៗនោះក្រុមជនសង្ស័យទាំង២នាក់នៅតែនាំគ្នាជិះម៉ូតូរត់គេច រហូតមកដល់ចំណុចខាងលើ ស្រាប់តែជនសង្ស័យក្រុមជនសង្ស័យផ្តួលម៉ូតូចោលហើយរត់គេចខ្លួនចូលក្នុងច្រកចូលដៀហែមបាត់ស្រមោលតែម្តង ចំណែកជនសង្ស័យម្នាក់ទៀតត្រូវបានសមត្ថកិច្ចខណ្ឌ៧មករាឃាត់ខ្លួនបាននឹងម៉ូតូមួយគ្រឿងម៉ាកសងកូរ៉េ ពណ៌ក្រហម គ្មានស្លាកលេខ នៅនឹងកន្លែងកើតហេតុ។
បច្ចុប្បន្នជនសង្ស័យរួមនឹងវត្ថុតាងនេះត្រូវបានកម្លាំងនគរបាលខណ្ឌ៧មករា ឃុំខ្លួនបណ្ដោះអាសន្ននៅអធិការដ្ឋាននគរបាល៧មករាដើម្បីសួរនាំចាត់ការតាមនីតិវិធី៕
ដោយ៖ ស រស្មី
...
