ទីក្រុងបាងកកមានការិយាល័យដែលមានតម្លៃទាបបំផុតនៅក្នុងពិភពលោក ដោយទីក្រុងនេះបានជាប់ចំណាត់ថ្នាក់ទី១០៩ ក្នុងចំណោម ១២៦ ទីក្រុងសំខាន់ៗ។ នេះដោយយោទៅតាមការស្ទង់មតិនៅឆ្នាំ២០១៦ ដោយក្រុមហ៊ុនពិគ្រោះយោបល់ផ្នែកអចលនទ្រព្យអន្តរជាតិ CBRE។
នៅក្នុងការស្រាវជ្រាវតម្លៃការិយាល័យសាកលលោកកាលពីខែមីនាឆ្នាំ២០១៦នោះ ក្រុមហ៊ុននេះបានដាក់ចំណាត់ថ្នាក់ទីក្រុងហុងកុងថា ជាតំបន់ដែលមានការិយាល័យថ្លៃជាងគេបំផុតនៅក្នុងសាកលលោក។
អាស៊ីនៅតែបន្តគ្រប់គ្រងជាតំបន់ ដែលមានតម្លៃជួលការិយាល័យថ្លៃជាងគេបំផុតរបស់ពិភពលោកដដែលក្នុងឆ្នាំនេះ។
បើទោះបីជាតម្លៃជួលមធ្យមទៅលើការិយាល័យកម្រិត A នៅតំបន់កណ្តាលក្រុងបាងកកបានកើនឡើង ៦,៦ភាគរយ បើធៀបនឹងឆ្នាំមុន ហើយស្ថិតក្នុងកំណើននៃការជួលការិយាល័យប្រចាំឆ្នាំក្នុងចំណោមទីក្រុង ២៥ ដែលកើនឡើងខ្ពស់ជាងគេបំផុតក៏ដោយ ក៏ទីក្រុងបាងកកនៅតែជាប់ចំណាត់ថ្នាក់ស្ទើរតែក្រោមគេបំផុតដែរ ពោលគឺជាប់ចំណាត់ថា្នក់លេខ៤រាប់ពីក្រោមក្នុងឆ្នាំ២០១៥។
ការជួលការិយាល័យកម្រិត A មានតម្លៃ ៩៥៩ បាតក្នុងមួយម៉ែត្រការ៉េក្នុងមួយខែ ស្មើនឹង ១ភាគ១០ បើធៀបនឹងទីក្រុងហុងកុង។ តម្លៃជួលនេះកើនឡើង ធៀបនឹងឆ្នាំ២០១៥ ដែលមានចំនួន ៩០០បាត។
លោក Nithipat Tongpun ប្រធានផ្តល់សេវាកម្មការិយាល័យរបស់ក្រុមហ៊ុន CBRE នៅប្រទេសថៃបានមានប្រសាសន៍ថា ការការិយាល័យទីក្រុងបាងកកនៅតែស្ថិតក្នុងតម្រូវការខ្លាំងដដែល បើទោះបីជាសេដ្ឋកិច្ចថៃមានការធ្លាក់ចុះក៏ដោយ ហើយកត្តានេះបានបន្តជំរុញឱ្យការជួលកើនឡើង។
លោក Richard Rarkham អ្នកសេដ្ឋកិច្ចរបស់ក្រុមហ៊ុន CBREបានមានប្រសាសន៍ថា យើងរំពឹងថា សេដ្ឋកិច្ចសកលនឹងបន្តកើនឡើង ហើយវិស័យសេវាកម្មការិយាល័យសកលនេះនឹងបន្តកើនឡើង ចំពេលដែលមានអស្ថិរភាពនៃសេដ្ឋកិច្ចនេះ។
លោកបានបន្ថែមទៀតថា វិស័យសេវាកម្មនេះនឹងបង្ហាញពីកំណើនខ្លាំង ជាពិសេសនៅក្នុងតំបន់អាស៊ី ដោយសារតែចំណូល និងការធានារ៉ាប់រងទទួលបានផលប្រយោជន៍យ៉ាងច្រើនពីទីផ្សារហ៊ុននេះ។
លោក Henry Chin ប្រធានស្រាវជ្រាវរបស់ក្រុម CBRE នៅតំបន់ប៉ាស៊ីហ្វិកបានមានប្រសាសន៍ថា ជាមួយការខ្វះខាតការិយាល័យនៅទីក្រុងហុងកុងនោះ ម្ចាស់ការិយាល័យបានបង្កើនតម្លៃជួលកើនឡើងខ្ពស់។
លោកបានបន្តទៀតថា ក្រុមហ៊ុនហិរញ្ញវត្ថុចិនដីគោកកំពុងតែស្វែងរកការិយាល័យនៅក្រុងហុងកុងដើម្បីពង្រីកពាណិជ្ជកម្មរបស់ពួកគេ៕
ដោយ៖ រ័ត្ន
