ភ្នំពេញ៖ បុរសម្នាក់ពាក់ព័ន្ធករណី ចែកចាយនិងប្រើប្រាស់គ្រឿងញៀនត្រូវ កម្លាំងនគរបាលមន្ទីប្រឆាំងគ្រឿងញៀននៃក្រសួងមហាផ្ទៃ ឃាត់ខ្លួន កាលពីវេលាម៉ោង០៤និង៤០នាទីល្ងាចថ្ងៃទី២៨ខែកក្កដាឆ្នាំ២០១៥ស្ថិតនៅចំណុចផ្ទះជួលលេខ១៨១ ផ្លូវ៨៦ សង្កាត់ស្រះចក់ ខណ្ឌដូនពេញ ជាក់ស្តែង ដកហូតម្សៅក្រាមពណ៍សថ្លាចំនួន៥កញ្ចាប់តូច ។
ជនសង្ស័យខាងលើមាន ឈ្មោះ ខាន់ ផល្លា ភេទប្រុស អាយុ៤៥ឆ្នាំ ស្នាក់នៅផ្ទះជួលលេខ១៨១ ផ្លូវ៨៦ សង្កាត់ស្រះចក់ ខណ្ឌដូនពេញ និងមុខរបរមិនពិតប្រាកដ។
ប្រភពពីសមត្ថកិច្ច បានឲ្យដឹងថា នៅមុនពេលឃាត់ខ្លួន ជនសង្ស័យខាងលើនេះ គឺកម្លាំងនគរបាល មន្ទីរប្រឆាំងគ្រឿង បានដាក់កម្លាំងតាមដានជាយូរមកហើយ លុះដល់ថ្ងៃខាងលើ ក៏ឃាត់ខ្លួន ឆែកឆេរឃើញមាន សារធាតុញៀន ក្រាមសថ្លា នៅក្នុងផ្ទះជួលចំនួន២កញ្ចាប់តូច រួចក៏រកឃើញ នៅក្នុងបឹនដាក់ដី នៅមុខផ្ទះ មានកប់សារធាតុញៀន នៅក្រោមដីក្នុងបឹននោះចំនួន៣កញ្ចាប់តូចបន្ថែមទៀតផងដែរ។
បច្ចុប្បន្នជនសង្ស័យ រួមទាំងវត្ថុតាង ត្រូវកម្លាំងមន្ទីប្រឆាំងគ្រឿងញៀននៃក្រសួងមហាផ្ទៃនាំយកទៅសួរនិងឃុំខ្លួនបណ្ដោះអាសន្នដើម្បីកសាងសំណុំបញ្ជូនខ្លួនទៅសាលាដំបូងរាជធានីភ្នំពេញចាត់ការតាមច្បាប់៕ ស ដារ៉ា
