ភ្នំពេញ ៖ បុរសម្នាក់បានបើករថយន្តមួយគ្រឿងម៉ាកហ៊ីលុចជ្រុលទៅបុកអ្នកអូសរទេះសំរាមរបស់ក្រុមហ៊ុន ស៊ិនទ្រីដែលចតនៅលើចិញ្ចើមផ្លូវបណ្ដោយឱ្យបោកក្បាលរងរបួសធ្ងន់ហើយរថយន្តបង្ករនៅតែមិនទាន់អស់ល្បឿនក៏រេចង្កូតទៅបុករបាំងថ្មពុះចែកផ្លូវបាក់អស់២កង់ ហេតុកាលនេះកើតឡើងនៅវេលាម៉ោង៥ទៀបភ្លឺថ្ងៃទី២៩ខែកក្កដា តាមផ្លូវលេខ២៧១ សង្កាត់ផ្សារដើមថ្កូវ ខណ្ឌចំការមន។
បើតាមប្រភពពត៌មានពីសាក្សីនៅកន្លែងកើតហេតុបានឲ្យដឹងថាមុនពេលកើតហេតុគេឃើញជនរងគ្រោះអ្នកអូសរទេះសំរាម របស់ក្រុមហ៊ុន ស៊ិនទ្រីកំពុងតែបោសថ្នល់ហើយចតរទេះអូសសំរាមនៅលើថ្នល់ក៏ត្រូវរថយន្តមួយគ្រឿងម៉ាកហ៊ីលុចពណ៌ស្លែ ពាក់ស្លាកលេខ ឆ-៨៦៦៩ ភព២ បើកបរដោយបុរសម្នាក់ក្នុងទិសដៅពីជើងទៅត្បូង ខណៈមកដល់ចំណុចខាងលើបានបើកបុករទេះដឹកសំរាមដែលចតនៅកណ្តាលផ្លូវពេញទំហឹងបណ្ដោយឱ្យអ្នកបោសថ្នល់ដួលបោកក្បាលរងរបួសធ្ងន់ ចំណែករថយន្តបង្ករបានរេចង្កូតទៅបុករបាំងថ្មពុះចែកផ្លូវបាក់អស់២កង់ ។
ក្រោយពេលកើតហេតុអ្នកបើករថយន្តបង្កបានបើកទ្វារត់គេចខ្លួនបាត់សម្រោលទុកតែរថយន្តនៅនិងកន្លែងកើតហេតុចំណែកអ្នករងរបួសធ្ងន់ត្រូវបានរថយន្តសង្គ្រោះដឹកយកទៅព្យាបាលនៅមន្ទីរពេទ្យមិត្តភាពខ្មែរសូវៀត ។ ចំណែករថយន្តបង្ករនិងរទេះដឹកសំរាមក្រុមហ៊ុនស៊ិនទ្រីត្រូវបានសមត្ថកិច្ចយកទៅការិយាល័យនគរបាលចរាចរណ៍ផ្លូវគោក ៕
