ខេត្តស្វាយរៀង៖ ផ្ទះប្រជាពលរដ្ឋ២ខ្នង បានរងការខូចខាតបាក់រលំទាំងស្រុងដោយសារមានភ្លៀង និងខ្យល់កន្ត្រាក់បោកបកយ៉ាងខ្លាំងកាលពីរវេលាម៉ោង៤និង៥នាទីសៀលថ្ងៃទី២៨ ខែកក្កដា ឆ្នាំ២០១៥ ស្ថិតក្នុងភូមិបន្ទាយក្រាំង ឃុំបន្ទាយក្រាំង ស្រុកកំពង់រោទ៍ ខេត្តស្វាយរៀង ។
បើតាមសមត្ថកិច្ចនគបាលប៉ុស្តិ៍ឃុំបន្ទាយក្រាំងបានអោយដឹងថា ម្ចាស់ផ្ទះឈ្មោះ ចាន់ ម៉ាឡៃ ភេទប្រុស អាយុ៣០ឆ្នាំ មុខរបរកសិករ មានទីលំនៅក្នុងភូមិបន្ទាយក្រាំងឃុំបន្ទាយក្រាំង ស្រុកកំពង់រោទ៍ ដោយផ្ទះមានទំហំ៦ម៉ែត្រគុណ៤ម៉ែត្រ សង់អំពីឈើជញ្ជាំងសង្ក័សី ដំបូលសង្ក័សី ខូចខាតទាំងស្រុង ព្រមទាំងសម្ភារមួយចំនួនដូចជា អង្ករ ស្រូវ និងម៉ូតូផងដែរ។
ម្ចាស់ផ្ទះទី២មានឈ្មោះទេព នាន់ ភេទប្រុស អាយុ៦៦ឆ្នាំ មុខរបរកសិករ ផ្ទះមានទំហំ៨ម៉ែត្រគុណ៦ម៉ែត្រ សសរថ្ម ជញ្ជាំងសង្ក័សី ប្រក់ដំបូលសង្ក័សី រលំខូចខាតទាំងស្រុង និងរបស់របរសម្ភារមួយចំនួន ។
សមត្ថកិច្ចបន្តថា ចំពោះករណីដែលដូលរលំផ្ទះខាងលើនេះគឺមិនបណ្តាលអោយប៉ះពាល់ដល់អាយុ ជីវិតមនុស្ស នឹងសត្វអ្វីនោះទេ ៕ យឹម សុថាន
