ខេត្តស្វាយរៀង៖   យ៉ាងហោចណាស់មនុស្ស២នាក់បានស្លាប់ភ្លាមៗនិងកន្លែងគួរអោយសង្វេគដោយសារករណីគ្រោះថ្នាក់ចរាចរណ៏រវាងម៉ូតូ២គ្រឿងបុកបញ្ច្រាស់ទិសគ្នាពេញទំហឹងលាន់សូរដូចរន្ទះផ្អើលអ្នកភូមិទាំងក្បាលល្ងាច។

ហេតុការណ៍នេះបានកើតឡើងកាលពីវេលាម៉ោង៥និង១០នាទីល្ងាចថ្ងៃ ទី២៦ ខែឧសភា ឆ្នាំ២០២៣ លេីផ្លូវ៣១៧B ស្ថិតនៅត្រង់ចំណុចភូមិស្វាយផ្អែម ឃុំព្រៃតាអី ស្រុកស្វាយទាប ខេត្តស្វាយរៀង។

យោងតាមសមត្ថកិច្ចនគរបាលស្រុកបានអោយដឹងថាបុរសដែលស្លាប់មានឈ្មោះ
កាយ សុភ័ក្រ្ត  អាយុ៣០ឆ្នាំ មុខរបរកសិករ រស់នៅភូមិត្រពាំងថ្កូវ ឃុំពងទឹក ស្រុករំដួល ខេត្តស្វាយរៀង
បើក ម៉ូតូម៉ាកហុងដាសេ១២៥ ពណ៌ខ្មៅស៊េរី២០១៥ ពាក់ស្លាកលេខ ភ្នំពេញ ១CV-៧២៦៩ ។

ចំណែកម្ខាងទៀតមានឈ្មោះ ភើក វីរ: ភេទប្រុស អាយុ១៧ឆ្នាំ មុខរបរកម្មកររោងចក្រ រស់នៅភូមិបាត់ថង់ ឃុំគគីរសោម ស្រុកស្វាយទាបខេត្តស្វាយរៀង បើកម៉ូតូ ម៉ាកហុងដាឌ្រីមសង់សេ១២៥ ពណ៌ខ្មៅស៊េរីឆ្នាំ២០២២ មានស្លាកលេខ ស្វាយរៀង ១R-៦៩៥២។

តាមសាក្សីបានអោយដឹងថាមុនកើតហេតុមានម៉ូតូមួយគ្រឿងម៉ាកហុងដាសេ១២៥ ពណ៌ខ្មៅស៊េរី២០១៥ ពាក់ស្លាកលេខ ភ្នំពេញ ១CV-៧២៦៩
ដោយធ្វើដំណើរក្នុងទិសដៅពី ជើងទៅត្បូង បើកបរមិនប្រកាន់ស្ដាំក៏បុកជាមួយម៉ូតូមួយគ្រឿងទៀត
ម៉ាកហុងដាឌ្រីមសង់សេ១២៥ ពណ៌ខ្មៅស៊េរីឆ្នាំ២០២២ មានស្លាកលេខ ស្វាយរៀង ១R-៦៩៥២ក្នុងទិសដៅបញ្ច្រាស់គ្នាយ៉ាងពេញទំហឹងបណ្ដាលអោយស្លាប់ទាំង២នាក់កណ្ដាលផ្លូវគួរអោយសង្វេគបំផុត។

ក្រោយគ្រោះថ្នាក់រួចមក សមត្ថកិច្ចបានចុះមកដល់គោលដៅទីតាំងកើតហេតុ រួចធ្វើការវាស់វែងប្រមូលយកមធ្យោបាយធ្វើដំណើររួមមានម៉ូតូទាំងពីរ យកទៅរក្សាទុកនៅ ប៉ុស្តិ៍នគរបាលរដ្ឋបាលឃុំព្រៃតាអី រង់ចាំភាគីទាំងពីរដោះស្រាយបន្ត រីឯសពបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណីទាំងក្ដុកក្ដួលបំផុត៕ ដោយ៖ សុថាន