ខេត្តកំពង់ឆ្នាំង : នាថ្ងៃទី៧ ខែមិថុនា ឆ្នាំ២០២៣ រដ្ឋបាលខេត្តកំពង់ឆ្នាំង បានបញ្ជាក់អោយដឹងថា , សម្តេចចៅហ្វាវាំង គង់ សំអុល ឧបនាយករដ្ឋមន្រ្ដី រដ្ឋមន្រ្តីក្រសួងព្រះបរមរាជវាំង និងជាព្រះរាជតំណាងដ៏ខ្ពង់ខ្ពស់បំផុតព្រះមហាក្សត្រនៃព្រះរាជាណាចក្រកម្ពុជា ចុះជួបសំណេះសំណាល និងពិនិត្យមើលការបង្កបង្កើនផល របស់ប្រជារាស្ត្រនៅក្នុងឃុំពពេល ស្រុកបរិបូណ៌ ខេត្តកំពង់ឆ្នាំង ។
រដ្ឋបាលខេត្តកំពង់ឆ្នាំង បានបញ្ជាក់ថា ៖ នៅថ្ងៃទី ០៦ ខែមិថុនា ឆ្នាំ២០២៣ ព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត បានសព្វព្រះរាជហឫទ័យត្រាស់បង្គាប់ សម្តេចចៅហ្វាវាំងវរវៀងជ័យអធិបតីស្រីង្គារ គង់ សំអុល ឧបនាយករដ្ឋមន្រ្ដី រដ្ឋមន្រ្តីក្រសួងព្រះបរមរាជវាំង ចុះជួបសំណេះសំណាល និងពិនិត្យមើលការបង្កបង្កើនផល របស់ប្រជារាស្ត្រនៅក្នុងឃុំពពេល ស្រុកបរិបូណ៌ ខេត្តកំពង់ឆ្នាំង ដែលព្រះអង្គសព្វព្រះរាជហឫទ័យ ប្រោសព្រះរាជទាននូវគ្រឿងចក្រចំនួន ៤គ្រឿង សម្រាប់ជួយក្នុងការភ្ជួររាស់ដីស្រែរបស់បងប្អូនប្រជាកសិករ។
ដោយមានការអញ្ជើញចូលរួមអមដំណើរពី លោក គុយ សុផល ទេសរដ្ឋមន្រ្តីទទួលបន្ទុកកិច្ចការទូទៅអមក្រសួងព្រះបរមរាជវាំង លោក ឈា ហន រដ្ឋមន្រ្តីអមក្រសួងព្រះបរមរាជវាំង ព្រមទាំងក្រុមការងារថ្នាក់ក្រសួង ថ្នាក់ខេត្ត ថ្នាក់ស្រុក និងឃុំ ភូមិ។
ក្នុងឱកាសនោះផងដែរ សម្តេច បានឧបត្ថម្ភថវិកាដល់ប្រជាកសិករក្នុងម្នាក់ៗ ១០,០០០៛ រីឯកុមារតូចៗក៏ទទួលបានថវិកា ១០,០០០៛ផងដែរ ៕
ដោយ : សិលា
