សារព័ត៌មាន AFP នៅថ្ងៃអាទិត្យ ទី១១ ខែមិថុនា ឆ្នាំ២០២៣ មន្ត្រីសេតវិមានម្នាក់ បាននិយាយថាចិនបានធ្វើប្រតិបត្តិការស្ថានីយស៊ើបការណ៍សម្ងាត់មួយ នៅក្នុងប្រទេសគុយបា អស់រយៈពេលជាច្រើនឆ្នាំមកហើយ និង បានធ្វើបច្ចុប្បន្នភាពមូលដ្ឋានស៊ើបការណ៍នេះក្នុងឆ្នាំ២០១៩ ជាផ្នែកមួយនៃការពង្រឹងវត្តមានរបស់ខ្លួននៅប្រទេសសិ្ថតក្នុងតំបន់ការីបៀនមួយនេះ។

នៅក្នុងលក្ខខណ្ឌមិនបញ្ចេញឈ្មោះ មន្ត្រីសេតវិមានខាងលើបានឱ្យដឹងដូច្នេះថា «នៅពេលលោកប្រធានាធិបតី ចូ បៃដិន ឡើងកាន់តំណែងកាលពីខែមករា ឆ្នាំ២០២១ យើង បានធ្វើបទបង្ហាញខ្លីៗពីកិច្ចខិតខំប្រឹងប្រែងដ៏រសើបមួយចំនួនរបស់ចិន នៅជុំវិញពិភពលោក ក្នុងគោលដៅពង្រីកវិស័យឡូហ្ស៉ីស្ទិក មូលដ្ឋាន និងហេដ្ឋារចនាសម្ព័ន្ធប្រមូល ព័ត៌មានជាសកល»។ មន្ត្រីរូបនេះដដែលបន្ថែមទៀតថា «កិច្ចខិតខំប្រឹងប្រែងទាំងនេះក្នុងនោះរួមមានទាំងការបង្កើតស្ថានីយស៊ើបការណ៍សម្ងាត់របស់ចិន ក្នុងប្រទេសគុយបា ហើយចិនបានដឹកនាំការធ្វើបច្ចុប្បន្នភាពលើស្ថានីយស៊ើបការណ៍សម្ងាត់របស់ខ្លួននៅគុយបា ក្នុងឆ្នាំ២០១៩»។
គួរបញ្ជាក់ថា កាលពីថ្ងៃព្រហស្បតិ៍កន្លងទៅនេះ កាសែតអាមេរិក Wall Street Journal បានរាយការណ៍ថាចិនបានឈានដល់កិច្ចព្រមព្រៀងជាសម្ងាត់ជាមួយប្រទេសគុយបា ក្នុងការដំឡើងស្ថានីយស៊ើបការណ៍មួយ នៅលើកោះដែលស្ថិតនៅចម្ងាយប្រហែល ១៦០គីឡូម៉ែត្រពីរដ្ឋផ្ល័រីដា សហរដ្ឋអាមេរិក។ Wall Street Journal ធ្វើសេចក្ដីរាយការណ៍ បែបនេះដោយផ្អែកលើប្រភពដែលខ្លួនទទួលបានពីក្រុមមន្ត្រីចារកម្មអាមេរិក ក្នុងលក្ខខណ្ឌមិនបញ្ចេញឈ្មោះ។ ក្រុមមន្ត្រីទាំងនោះបានឱ្យដឹងទៀតថា ការដំឡើង ស្ថានីយ៍ស៊ើបការណ៍នៅលើទឹកដីគុយបា នឹងអនុញ្ញាតឱ្យទីក្រុងប៉េកាំង លួចស្ដាប់ និងប្រមូលព័ត៌មានពីការទំនាក់ទំនងនានាតាមប្រព័ន្ធអេឡិចត្រូនិក នៅទូទាំងតំបន់ភាគខាងត្បូងសហរដ្ឋអាមេរិក ព្រមទាំងអាចតាមដានចរាចរណ៍នាវាផងដែរ។
បើតាម Wall Street Journal ចិន និងគុយបា បានឈានដល់កិច្ចព្រមព្រៀងមួយជាគោលការណ៍ ដោយក្នុងនោះចិននឹងត្រូវបង់ប្រាក់ឱ្យគុយបា រាប់ពាន់លានដុល្លារ ជាថ្នូរនឹងការបើកស្ថានីយស៊ើបការណ៍។ យ៉ាងណាក៏ដោយ ខាងទីក្រុងវ៉ាស៊ីនតោន និងគុយបា បានបដិសេធសេចក្ដីរាយការណ៍នេះ ខណៈនៅពេលត្រូវបានសាកសួរពីបញ្ហា នេះដែរ អ្នកនាំពាក្យក្រសួងការបរទេសចិន លោក វ៉ាង វិនពីង (Wang Wenbin) ថាលោកមិនបានដឹងពីស្ថានការណ៍នោះទេ តែបានឆ្លៀតរិះគន់គោលនយោបាយរបស់ សហរដ្ឋអាមេរិកចំពោះគុយបា៕

រូប​ថត​ : TTXVN -VNA