ខេត្តពោធិ៍សាត់៖ រថយន្តសាំយ៉ុងដឹកអ្នកដំណើរចំណុះ១៥កៅអី១គ្រឿង បើកលឿនដូចហោះបានជ្រុលចង្កូតបុកអ្នក
ករណីគ្រោះថ្នាក់ចរាចរណ៍ខាងលើនេះ កើតឡើងកាលពីវេលាម៉ោង១និង០៥នាទីរសៀលថ្ងៃទី២៤ ខែមិថុនា ឆ្នាំ២០១៦ ត្រង់ចំណុច ១០៨៤៤-៨៥១៨៩ ស្ថិតក្នុងភូមិទទឹង ឃុំអន្លង់ត្នោត ស្រុកក្រគរ ខេត្តពោធិ៍សាត់។
ប្រភពព័ត៌មានពីមូលដ្ឋានកងរាជអាវុធហត្ថស្រុកក្រគរបានឲ្យដឹងថា រថយន្តបង្កម៉ាកសាំយ៉ុង ពណ៌ស ពាក់ស្លាកលេខ ពោធិ៍សាត់ 2A-1477 ចំណុះ១៥កៅអីដឹងអ្នកដំណើរ បើកបរដោយឈ្មោះ ភាពវុទ្ធី ភេទប្រុស អាយុ៣២ឆ្នាំ រស់នៅភូមិកាប៉ាស់ ឃុំឈើតុំ ស្រុកក្រគរ ខេត្តពោធិ៍សាត់ (រត់គេចខ្លួន) ធ្វើដំណើរក្នុងទិសដៅពីលិចទៅកើត លុះមកដល់ចំណុចកើតហេតុបានជ្រុលបុកអ្នកធ្វើដំណើរថ្មើរជើងម្នាក់ស្លាប់មួយរំពិចនៅនិងកន្លែងតែម្ដង។
ប្រភពពីកម្លាំងអាវុធហត្ថមូលដ្ឋានបន្តថា ជនរងគ្រោះត្រូវបានគេស្គាល់ឈ្មោះ ចឹក ហេន ភេទប្រុស អាយុ៣៩ឆ្នាំ រស់នៅភូមិបន្ទាយក្រង ឃុំអន្លង់ត្នោត ស្រុកក្រគរ ខេត្តពោធិ៍សាត់។ ប្រភពដដែលអះអាងបន្តទៀតថា មូលហេតុការគ្រោះថ្នាក់ចរាចរណ៍ដ៍រន្ធត់ខាងលើនេះបណ្ដាលមកពីជនរងគ្រោះស្រវឹងស្រាជោកជាំ ហើយបានរត់ចូលរថយន្តខណៈកំពុងបើកបរក្នុងល្បឿនលឿន។
ក្រោយកើតហេតុ សាកសពបានប្រគល់ឲ្យក្រុមគ្រួសារសាច់ញាតិយកទៅចាត់ចែងធ្វើបុណ្យតាមប្រពៃណី ចំណែកវត្ថុតាងរថយន្តបង្កត្រូវបានស្នងការដ្ឋាននគរបាលខេត្តយកទៅរក្សាទុកដើម្បីរងចាំធ្វើការដោះស្រាយគ្នាតាមនីតិវិធី៕
ដោយ៖ ប៉ឹម ពិន
