ខេត្តកំពង់ស្ពឺ៖ នៅក្នុងឱកាសជួបសំណេះសំណាលជាមួយប្រជាពលរដ្ឋនៅឃុំមនោរម្យ និងឃុំវាលពន់ ស្រុកថ្ពង ខេត្តកំពង់ស្ពឺលោកហ៊ុន ម៉ានី បានសំដែងនូវមោទនភាពចំពោះអ្វីដែលប្រជាពលរដ្ឋនៅបន្តគាំទ្រគណបក្សប្រជាជនកម្ពុជានាពេលកន្លងមកក៏ដូចជាទៅថ្ងៃអនាគតពិសេសសម្រាប់ការបោះឆ្នោតនៅថ្ងៃទី២៣ ខែកក្កដា ឆ្នាំ២០២៣ខាងមុខនេះ។
ប្រជាពលរដ្ឋនៅក្នុងខេត្តកំពង់ស្ពឺ ពិសេសពលរដ្ឋវ័យ ចាស់បានប្រកាសបន្តគាំទ្រនិងជឿជាក់លើគណបក្ស ប្រជាជនកម្ពុជា ក៏ដោយសារតែគណបក្សប្រជាជនកម្ពុជាបានរំដោះជីវិតពលរដ្ឋចេញពីភ្លើងសង្គ្រាម និងផ្ដល់ភាពសុខសាន្តក្នុងការរស់នៅដូចបច្ចុប្បន្ន។ នេះជាការលើកឡើងរបស់ពលរដ្ឋ នៅក្នុងឱកាសជួបសំណេះ សំណាលជាមួយលោកហ៊ុន ម៉ានី ក្រុមការងារគណបក្ស ប្រជាជនកម្ពុជាចុះជួយខេត្តកំពង់ស្ពឺ។
នៅថ្ងៃទី១៣ ខែកក្កដា ឆ្នាំ ២០២៣នេះ ប្រជាពលរដ្ឋជាង៨០០នាក់រស់នៅឃុំមនោរម្យនិងឃុំ វាលពន់ ស្រុកថ្ពង ខេត្តកំពង់ស្ពឺ បានជួបសំណេះ សំណាលជាមួយលោកហ៊ុន ម៉ានី ក្រុមការងារគណបក្សប្រជាជនកម្ពុជាចុះមូលដ្ឋានជួយខេត្តកំពង់ស្ពឺ។
ក្នុងឱកាសនេះប្រជាពលរដ្ឋដែលធ្លាប់បានឆ្លងកាត់ការលំបាកដូចជាសង្រ្គាម,ភាពអត់ឃ្លាន និងភាពភ័យខ្លាចក្នុងរបបប្រល័យពូជសាសន៍ ខ្មែរក្រហមបានបញ្ជាក់ថា គណបក្សបក្សប្រជាជនកម្ពុជា គឺជាបានរំដោះជីវិតប្រជាពលរដ្ឋចេញពីសេចក្ដីស្លាប់ ហើយបានដឹកនាំប្រទេសកម្ពុជាឱ្យរស់រានមានជីវិតមកទល់បច្ចុប្បន្នដោយទទួលបាននូវភាពសុខសាន្តគ្រប់បែបយ៉ាង។
នៅក្នុងឱកាសនោះលោក ហ៊ុន ម៉ានី បានអំពាវនាវដល់ប្រជាពលរដ្ឋសូមទៅបោះឆ្នោតនៅថ្ងៃទី ២៣ ខែកក្កដា ឆ្នាំ២០២៣ខាងមុខឱ្យបានគ្រប់ៗគ្នា។ លោកក៏បានក្រើនរម្លឹកដល់ពលរដ្ឋត្រូវត្រៀមអត្តសញ្ញាណបណ្ណ ឬឯកសារបញ្ជាក់អត្តសញ្ញាណសម្រាប់បម្រើដល់ការ បោះឆ្នោតនាពេលខាងមុខឱ្យបានត្រឹមត្រូវ៕
