ភ្នំពេញ៖ ក្រោយពីបានឆ្លងកាត់ការ ប្រកួតដ៏ស្វិតស្វាញអស់រយៈពេល២៤ សប្តាហ៍កន្លងទៅ ក្នុងការប្រកួតកីឡាបាល់បោះដណ្តើមពានរង្វាន់បាយ័នអ៊ែរឡាញលើកទី២ឆ្នាំ២០១៦ដែលបានដំណើរតាំងពីថ្ងៃទី២៧ ខែធ្នូ ឆ្នាំ២០១៥ ហើយបាន បញ្ចប់់កាលពីរសៀលថ្ងៃទី២៦ ខែមិថុនា ឆ្នាំ២០១៦ ។
លោក កែវ កាន់ណាលី អគ្គលេខាធិការ រងសហព័ន្ធកីឡាបាល់បោះកម្ពុជាបានឲ្យដឹងថា ការប្រកួតកីឡាបាល់បោះដណ្តើមពានរង្វាន់បាយ័នអ៊ែរឡាញលើកទី២នេះ មានក្រុមកីឡាករ ដាក់ពាក្យចូលរួមប្រកួតប្រមាណ១៦ក្រុម ដោយអនុវត្តតាមរូបមន្តប្រកួតវិលជុំជម្រុះសម្រាប់ជុំទី១ដោយទុកតែ១០ក្រុមប៉ុណ្ណោះ ។ ដោយឡែកជុំទី២ សម្រាំងយកតែ៤ក្រុមក្នុងចំណោម១០ក្រុមដែលមានពិន្ទុច្រើនជាងគេឲ្យប្រកួតក្នុងវគ្គពាក់កណ្តាលផ្តាច់ព្រ័ត្រនិងផ្តាច់ព្រ័ត្រសរុបទាំងអស់មាន១០៧ប្រកួតដោយក្នុងជុំទី១មាន៥៦ប្រកួត និងជុំទី២មាន៥១ប្រកួត ។
លោកបញ្ជាក់ថា ជាលទ្ធផលនៃការ ប្រកួតដណ្តើមពានរង្វាន់បាយ័នអ៊ែរឡាញនេះចំណាត់ថ្នាក់លេខ១បានទៅលើក្រុម An Hue Shang hue លើកពានរង្វាន់ បាយ័នអ៊ែរឡាញ, ចំណាត់ថ្នាក់លេខ២ បានទៅលើក្រុម Extra joss Fighter, ចំណាត់ថ្នាក់លេខ៣ បានទៅក្រុមបាយ័ន អ៊ែរឡាញ និងចំណាត់ថ្នាក់លេខ៤បាន ទៅក្រុម Smart Dragons ។ ចំណែកក្រុមបាល់បោះ៥ក្រុមផ្សេងទៀតដែលមិនបានជាប់ចំណាត់ថ្នាក់ប្រចាំឆ្នាំក៏ទទួលបាន បណ្ណសរសើរព្រមទាំងទទួលបានថវិកាលើក ចិត្តផងដែរ ៕
ដោយ៖ សារីម
