ភ្នំពេញ៖ បុរសម្នាក់បានរងរបួសធ្ងន់ត្រូវបានមិត្តភក្តិដឹកទៅមន្ទីរពេទ្តភ្លាមៗខណៈរូបគេបើកម៉ូតូឌុបគ្នារវល់និយាយជាមួយមិត្តភក្តិ មិនបានមើលមុខ ទៅបុកពីក្រោយរថយន្តប៊ែនដឹកថ្មដែលចតលើចិញ្ចើមផ្លូវដោយមិនមានដាក់ស្លាកសំគាល់និងបើកភ្លើងស៊ីញ៉ូ ។

ហេតុការណ៍នេះកាលពីវេលាម៉ោង១១ និង១០នាទីយប់ថ្ងៃទី ២៨ ខែមិថុនា ឆ្នាំ២០១៦ នៅតាមបណ្តោយផ្លូវវេងស្រេង មុខផ្សារកាណាស៊ីធី ភូមិចោមចៅ ខណ្ឌពោធិ៍សែនជ័យ ។

តាមប្រភពពីកន្លែងបានដឹងថា មុនពេលកើតហេតុគេឃើញបុរសរងគ្រោះខាងលើជិះម៉ូតូម៉ាកហុងដាសង់ សេ១២៥ ពណ៌ខ្មៅ ពាក់ស្លាកលេខភ្នំពេញ 1FA-6781 និងមានមិត្តភក្តិម្នាក់ទៀតជិះម៉ូតូមួយគ្រឿងទៀតទទឹមគ្នាបណ្តោយផ្លូវវេងស្រេង ទិសដៅពីលិចទៅកើត លុះមកដល់ចំណុចកើតហេតុ ក៏វ៉ាក់អើ រថយន្តប៊ែនដឹកដីម៉ាក HINO ពណ៌លឿង ពាក់ស្លាកលេខក្រុងព្រះសីហនុ 3A-3418 ដែលឈប់ចតចោលលើចិញ្ចើមផ្លូវ ដោយមិនមានស្លាក ឬភ្លើងសញ្ញាសំគាល់ ធ្វើឲ្យបុរសទាំង២នាក់ខាងលើមើលមិនទាន់ទៅបុកពីក្រោយពេញទំហឹង បណ្តាលរងរបួសបែកមុខបែកមាត់ហូរឈាមស្រោចខ្លួន ត្រូវបានមិត្តភក្តិដែលជិះម៉ូតូមួយគ្រឿងផ្សេងទៀតដឹកទៅព្យាបាលក្លីនិកក្បែរកន្លែងកើតហេតុ ។

ក្រោយពេលកើតហេតុ សមត្ថកិច្ចមូលដ្ឋានទាក់ទងទៅប៉ូលីសជំនាញមកវាស់វែងយកម៉ូតូនិងរថយន្តទៅទុកនៅផ្នែកជំនាញចរាចរណ៍ខណ្ឌពោធិ៍សែនជ័យ ដើម្បីរងចាំការដោះស្រាយ ៕

ដោយ៖ សុខាសែនជ័យ