អ្នកស្លាប់និងរងរបួសដេកពាសពេញក្នុងអាកាសយានដ្ឋាន Ataturk ក្នុងទីក្រុង Istanbul ប្រទេសទួគីកាលពីថ្ងៃទី២៨ ខែមិថុនា ក្រោយពេលភេរវករ ៣នាក់បានបំផ្ទុះគ្រាប់បែកអត្តឃាតលាក់នៅលើខ្លួន។
នាយករដ្ឋមន្ត្រីទួគីលោក Yildirim បានបញ្ចាក់ថា មានអ្នកស្លាប់រហូតដល់ទៅ ៣៦នាក់ ហើយការវាយប្រហារខាងលើអាចជាស្នាដៃរបស់ក្រុមភេរវករ IS ។ អាមេរិកក៏បានថ្កោលទោសយ៉ាងខ្លាំងដល់សកម្មភាពវាយប្រហារខាងលើ។
សារព័ត៌មាន រ៉យទ័រ បានដកស្រង់សម្តីអភិបាលក្រុងអ៊ីស្តានប៊ូល លោក Sasip Sahin បញ្ចាក់ថា មានអ្នកស្លាប់ ៣៦នាក់និងជាង ៦០នាក់រងរបួស។ លោកបន្តទៀតថា ក្រុមភេរវកររហូតដល់ទៅ៣នាក់បានបំផ្ទុះគ្រាប់បែក អត្តឃាតខាងលើ។
លោក Ali Tekin សាក្សីនៅកន្លែងកើតហេតុបានឲ្យដឹងថា «មានការផ្ទុះយ៉ាងខ្លាំងធ្វើឲ្យស្ថានភាពនៅខាងក្នុងស្ថានីយធ្លាក់ក្នុងសភាពចលាចល មនុស្សស្លន់ស្លោរ»។ ការផ្ទុះកើតឡើងក្នុងពេលដែលអ្នកដំណើរកំពុងតែរងចាំនៅក្លោងទ្វាចូលទៅកាន់កន្លែងរង់ចាំការហោះហើរ។
ស្ត្រីអាល្លឺម៉ង់ម្នាក់ឈ្មោះ Duygu ដែលមានសំណាងបានបំពេញបែបបទរួចចូលខាងក្នុងបានឲ្យដឹងថា គត់បានឮស៊ូស្នូកាំភ្លើងជាច្រើនគ្រាប់រួមមានសម្លេងផ្ទុះយ៉ាងខ្លាំងធ្វើឲ្យគាត់ត្រូវក្រាបចុះនឹងដីជាបន្ទាន់។
បុរសវ័យ៧៧ឆ្នាំម្នាក់បានរៀបរាប់ឲ្យដឹងថា គាត់បានឃើញខ្មាន់កាំភ្លើងបាញ់ប្រហារទៅលើហ្វូងមនុស្សស្លូតត្រង់នៅជុំវិញខ្លួន ។ ខ្មាន់កាំភ្លើងស្លៀងពាក់ពណ៌ខ្មៅពាក់ស្រោមមុខ។
រដ្ឋមន្ត្រីក្រសួងយុត្តិធម៌ទួគីបានឲ្យដឹងថា ខ្មាន់កាំភ្លើងបានប្រើប្រាស់កំាភ្លើង AK 47 ស្វ័យប្រវត្តិហើយនៅកន្លែងកើតហេតុប៉ូលិសបានប្រទះឃើញកាំភ្លើងមួយដើមដែលពួកគេទុកចោល។
ប៉ូលិសទួគីបានបញ្ចាក់ថា នៅច្រកផ្លូវចូលក្នុងអាកាសយានដ្ឋានអន្តរជាតិ Ataturk ភេរវករម្នាក់បានបាញ់រះដោយប្រើប្រាស់កាំភ្លើងផលិតដោយក្រុមហ៊ុន Kalashnikov ក្នុងប្រទេសរុស្ស៊ី បន្ទាប់មកក៏បានបំផ្ទុះគ្រាប់បែកបង្កៃនៅក្នុងខ្លួនតែម្តង។ ជាមួយគ្នានោះប៉ូលិសបានរារាំងភេរវករពីរនាក់ទៀតព្យាយ៉ាមចូលខាងក្នុង ប៉ុន្តែពួគេបានបំផ្ទុះគ្រាប់បែកអត្តឃាតជាប់នឹងខ្លួនតែម្តងចៀសវាងប៉ូលិសចាប់បាន។
ប្រធានាធិបតីទួគីលោក Tayyip Erdogan បានថ្កោលទោសយ៉ាងខ្លាំងដល់សកម្មភាពខាងលើ ហើយលោកប្រកាសថា នឹងបើកយុទ្ធនាការប្រឆាំងក្រុមភេរវកម្មជាទ្រង់ទ្រាយធំដើម្បីបញ្ចប់សកម្មភាពបែកនេះកើតឡើងនាពេលអនាគត់៕
ប្រែសម្រួល៖ សាធី
