ភ្នំពេញ៖ យោងតាមសេចក្តីរាយការណ៍របស់ប្រជាពលរដ្ឋរស់នៅក្នុងសង្កាត់កោះដាច់ បាននាំគ្នាស្នើរសុំឱ្យលោក លឹម សុភា អភិបាល នៃគណៈអភិបាលខណ្ឌជ្រោយចង្វាមេត្តាជួយពិនិត្យលោក បុិច ចាម ដែលជាចៅសង្កាត់កោះដាច់ទើបឡើងកាន់តំណែងថ្មី មិនទាន់បាន១ឆ្នាំនៅឡើយនោះទេ ក៏ប៉ុន្តែ ស្រាប់តែហ៊ានគប់គិតគ្នាយ៉ាងល្អប្រសើរជាមួយក្រុមឈ្មួញកាប់កាយយកអាចម៍ដីអូរតានងលក់យកលុយដាក់ហោប៉ៅចែកគ្នាចាយ ក្រោមលេសស្ដារស្រះចិញ្ចឹមត្រី ,ធ្វើរមណីយដ្ឋាន និងហេតុផលផ្សេងៗ។
សេចក្ដីរាយការណ៍ដដែលបន្តថា ទីតាំងដែលលោក បុិច ចាម ចៅសង្កាត់កោះដាច់ ឱ្យគេជីកកាយយកអាចមីដីទៅលក់យ៉ាងរំភើយស្ថិតក្នុងភូមិអូរតានង ដោយរាល់អាចម៏ដីមួយឡានមានតម្លៃ ចាប់ពីរ២០ដុល្លារ ទៅ២៥ដុល្លារអាមេរិក ក្នុងមួយថ្ងៃមិនក្រោមពី៥០ឡានទៅ១០០ឡាននោះទេ ខណៈមានក្រុមហ៊ុនចំនួនពីរ ទី១,ឈ្មោះ សេង គឹមហោ និងទី២,ឈ្មោះ អៀត ចំរើន។
ជាមួយគ្នានេះ ប្រជាពលរដ្ឋបានបង្ហេីបប្រាប់ទៀតថា នៅក្នុងកិច្ចការងារនេះ លោកចៅសង្កាត់បានប្រើ លោក សេង ហ៊ន់ ដែលជាជំនួយការភូមិ ធ្វើជាមេការគ្រប់គ្រង និងកត់បុងរាប់ចំនួនជើងឡាន ក្នុងមួយឡាន លោក សេង ហ៊ន់ ត្រូវយកមួយដុល្លារ ដាក់ចូលទៅក្នុងសង្កាត់ និងនៅសល់តម្លៃប៉ុន្មាន ខាងក្រុមហ៊ុន និងលោកចៅសង្កាត់ត្រូវចែកភាគហ៊ុនគ្នា។
ជុំវិញករណីខាងលេីនេះ អង្គភាពកាសែតនគរវត្ត និងគេហទំព័រនគរដ្រេហ្គន នៅព្រឹកថ្ងៃអង្គារទី២២ ខែសីហា ឆ្នាំ២០២៣នេះ បានទំនាក់ទំនងតាមទូរស័ព្ទ លោក បុិច ចាម ចៅសង្កាត់កោះដាច់ ដេីម្បីសាកសួរបំភ្លឺជុំវិញករណីនេះដែរ ដោយលោកឆ្លើយបញ្ជាក់ថា៖” ការស្តារស្រះនេះ គឺជាស្រះចាស់ ហេីយបារយកភក់ ដែលស្អុយៗចេញយកទៅដាក់ក្បែរទីតាំងនោះទេ”។ លោកបន្តថា ប្រជាពលរដ្ឋមិនបានមកសាលាសង្កាត់ ដេីម្បីសួរនាំឱ្យដឹងរឿងរ៉ាវច្បាស់លាស់ ដោយគ្រាន់តែស្ដាប់ពាក្យជនមួយកណ្តាប់តូចមកទំលាក់កំហុសមកលេីគាត់ ខ្ញុំស្បថថា ពាក់ព័ន្ធរឿងស្រះនេះ ខ្ញុំគ្មានពាក់ព័ន្ធនិងលុយកាក់នោះទេ។
លោកចៅសង្កាត់រូបនេះ បានឱ្យដឹងទៀតថា រឿងឱ្យក្រុមហ៊ុនស្តារស្រះនោះ គឺផ្លូវក្នុងភូមិអូរតានង ផ្លូវចាស់ហើយវាទាប ចឹងយេីងត្រូវយកដីដែលល្អពីបឹងតាត្រេះ មកចាក់ជំនួស ដេីម្បីដោះដូរគ្នា។
ដោយឡែកជុំវិញករណីនេះដែរ លោក លឹម សុភា អភិបាល នៃគណៈអភិបាលខណ្ឌជ្រោយចង្វា នៅព្រឹកថ្ងៃអង្គារទី២២ ខែសីហានេះដែរ អង្គភាពយេីងបានទំនាក់ទំនងតាមទូរស័ព្ទ និងប្រព័ន្ធសង្គមតេឡេក្រាមរបស់លោក ប៉ុន្តែលោកមិនទាន់ឆ្លេីយតបនោះទេ។
ចំណែកបញ្ហានេះដែរ បុគ្គលឈ្មោះ សេង គឹមហោ និងឈ្មោះ អៀត ចំរើន ដែលប្រជាពលរដ្ឋអះអាងថា ជាឈ្មួញរកស៉ីកាយយកអាចមីដីទៅលក់យ៉ាងអនាធិបតេយ្យខាងលេីនេះ អង្គភាពយេីងមិនមានលេខទូរស័ព្ទ ដេីម្បីធ្វើការសាកសួរនោះទេ ប៉ុន្តែប្រសិនបើពួកគាត់ចង់បកស្រាយបំភ្លឺ ចំពោះករណីនេះ អង្គភាពយេីងរង់ចាំការបំភ្លឺផងដែរ៕
ដោយ៖អរុណរះ
