ភ្នំពេញ ៖ ក្នុងរយៈពេល០២ថ្ងៃ(ថ្ងៃទី២៩ និងទី៣០ ខែសីហា ឆ្នាំ២០២៣នេះ កម្លាំងជំនាញកងរាជអាវុធហត្ថខណ្ឌដង្កោ បានធ្វេីការចាប់ឃាត់ខ្លួនជនសង្ស័យចំនួន០៥នាក់ជាបន្តបន្ទាប់ ពាក់ព័ន្ធករណីគ្រឿងញៀន រួចកសាងសំណុំរឿងបញ្ចូនអាវុធហត្ថជំនាញរាជធានីភ្នំពេញ ដេីម្បីចាត់ការបន្តតាមនីវិធី ។
គួរបញ្ចាក់ថា នៅថ្ងៃទី២៩ ខែសីហា ឆ្នាំ២០២៣ វេលាម៉ោង២០ និង៣០នាទី ដោយមានបទបញ្ជាពីលោកមេបញ្ជាការខណ្ឌ កម្លាំងជំនាញអាវុធហត្ថខណ្ឌដង្កោ បានចេញល្បាត និងពួនស្ទាក់ក្នុងភូមិសាស្រ្ត លុះម៉ោង០១និង១៥នាទី ថ្ងៃទី៣០ ខែសីហា ឆ្នាំ២០២៣ កម្លាំងជំនាញបានជិះល្បាតដល់ត្រង់ចំណុចផ្លូវបេតុង ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ក៏ប្រទះឃើញជនសង្ស័យចំនួន ០៣នាក់កំពុងជិះម៉ូតូ ០២គ្រឿង ភ្លាមនោះកម្លាំងជំនាញក៏បានឃាត់សួរនាំ និងឆែកឆេរឃើញមានជញ្ជីងថ្លឹងគ្រឿងញៀនចំនួន ០១គ្រឿង និងម្សៅក្រាមពណ៏សថ្លាចំនួន ០១កញ្ចប់តូច(សង្ស័យជាសារធាតុញៀន)
ជនសង្ស័យចំនួន ០៣នាក់រួមមាន ៖ ទី១.ឈ្មោះ ចែម លីហួរ ភេទប្រុស អាយុ ១៥ឆ្នាំ មុខរបរ សិស្ស ស្នាក់នៅបន្ទប់ជួលភូមិទ្រា សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។ ទី២.ឈ្មោះ ប៊ុនថន វឌ្ឍនៈ ភេទប្រុស អាយុ ១៤ឆ្នាំ មុខរបរ សិស្ស ស្នាកនៅបន្ទប់ជួលភូមិទ្រា សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។ និងទី៣.ឈ្មោះ ឈឺន សុឃីម ភេទប្រុស អាយុ ៣៧ឆ្នាំ មុខរបរបុគ្គលិកល្បែងអនឡាញ ស្នាក់នៅបន្ទប់ជួលភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ។
ដោយវត្ថុតាងចាប់យក ៖
– ក្រាមពណ៏សថ្លាចំនួន ០១កញ្ចប់តូច (សង្ស័យជាសារធាតុញៀន) ។ ,ម៉ូតូចំនួន ០២គ្រឿង (១.ម៉ាក់ BeAT ពណ៍សលាយខៀវ ពាក់ស្លាកលេខ ភ្នំពេញ 1JB-6267 ,២.ម៉ាកស្មាសRevo ពណ៏ខ្មៅ ពាក់ស្លាកលេខ កំពង់ស្ពឺ 1C-3324) ។ – ជញ្ជីងថ្លឹងគ្រឿងញៀនចំនួន ០១គ្រឿង
– ទូរសព្ទ័ដៃចំនួន ០៣គ្រឿង (១.ម៉ាក់ oppo ០១គ្រឿង ,២.ម៉ាកsamsung ០១គ្រឿង ៣.ម៉ាកNokai ០១គ្រឿង )
-លុយចំនួន ៤០០០០រៀល។
ក្រោយពីកម្លាំងជំនាញបានធ្វើការសួរនាំជនសង្ស័យបានសារភាពថាខ្លួនទាំងបីនាក់ពិតជាបានប្រើប្រាស់គ្រឿងញៀនពិតប្រាកដមែន ។ លុះដល់វេលាម៉ោង១០និង៥១នាទី ថ្ងៃទី៣០ ខែសីហា ឆ្នាំ២០២៣ ដោយមានការសម្របសម្រួលពី លោក សេង ម៉េងស្រ៊ុន ព្រះរាជអាជ្ញារងប្រចាំខណ្ឌដង្កោ និងបទបញ្ជាពីលោកមេបញ្ជាការខណ្ឌ ព្រមទាំងមានការចង្អុលបង្ហាញរបស់ជនសង្ស័យ កម្លាំងជំនាញយើងបានបន្តនិតិវិធីចុះដល់ចំណុចផ្ទះខ្ទម ស្ថិតនៅភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ដោយធ្វើការចាប់ខ្លួនជនសង្ស័យចំនួន ០២នាក់ទៀតរួមមាន ៖ ទី១.ឈ្មោះ ឃុន សំណាង ភេទប្រុស អាយុ ២១ឆ្នាំ មុខរបរជាងឡាន មានទីលំនៅភូមិទួលសំបូរ សង្កាត់ព្រៃវែង ខណ្ឌដង្កោ រាជធានីភ្នំពេញ ។ និងទី២.ឈ្មោះ ស្រាង និមេត ភេទប្រុស អាយុ ២១ឆ្នាំ មុខរបរមិនពិតប្រាកដ ស្នាក់នៅបន្ទប់ជួលភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ។
ដោយវត្ថុតាងចាប់យក ៖ -ក្រាមពណ៏សថ្លាចំនួន ២១កញ្ចប់(ធំ ០១) (សង្ស័យជាសារធាតុញៀន)។ – ម៉ូតូចំនួន ០១គ្រឿង ម៉ាក ស្មាសV ពណ៏ខ្មៅ ពាក់ស្លាកលេខ ភ្នំពេញ 1BL-2518 ។ ទូរសព្ទ័ដៃចំនួន ០១គ្រឿង (ម៉ាកoppo) ។ – ថង់ច្រក និងឧបករណ៍ប្រើប្រាស់សារធាតុញៀនមួយចំនួន ។
បច្ចុប្បន្ននេះ ជនសង្ស័យទាំង ០៥នាក់ រួមទាំងវត្ថុតាងខាងលើត្រូវបានបញ្ជូនទៅកាន់ការិយាល័យប្រឆាំងបទល្មើសគ្រឿងញៀន នៃកងរាជអាវុធហត្ថរាជធានីភ្នំពេញ ចាត់ការបន្តតាមនីតិវិធី ៕ ដោយ ៖ ភារ៉ា ដង្កោ
