ភ្នំពេញ ៖ បុរសម្នាក់បានរលាក់រលាត់ខ្លួនប្រាណរបួសធ្ងន់ធ្ងរ ហេីយត្រូវបានប្រជាពលរដ្ឋនិងសមត្ថកិច្ចយករថយន្តស្ទួចមកស្ទួចពីលេីដំបូលស័ង្កសីចុះមកក្រោមដឹកយកទៅសង្គ្រោះភ្លាមៗ ដោយបង្កការភ្ញាក់ផ្អេីលកាលពីវេលាម៉ោង១១ និង១០នាទីព្រឹក ថ្ងៃទី១ ខែកញ្ញា ឆ្នាំ២០២៣ នៅចំណុចឃ្លាំងលក់ថ្នាំលាបពណ៌មួយកន្លែងតាមបណ្ដោយផ្លូវ៣៧១ ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ។
តាមប្រភពពីកម្មករក្នុងឃ្លាំងទីតាំងខាងលេីបានប្រាប់ថា ជនរងគ្រោះមានឈ្មោះ ផល អាយុជាង៤០ឆ្នាំ មុខរបរបុគ្កលិកក្នុងឃ្លាំងលក់ថ្នាំលាបពណ៌ រស់នៅឯស្រុកលេីកដែក ខេត្តកណ្ដាល ។ ខណៈនៅពេលកេីតហេតុនោះ ជនរងគ្រោះបានយកជណ្ដេីរឡេីងលេីដំបូលឃ្លាំងដេីម្បីជួយទប់ឱ្យកម្មករដូចគ្នាបាញ់កាវ តែឡេីងដល់លេីដំបូលភ្លាមក៏ប៉ះជាមួយខ្សែភ្លេីងស្រាតបណ្ដាលឱ្យឆក់រលាក់រលាត់ខ្លួនប្រាណរងរបួសធ្ងន់ធ្ងរតែម្ដង ។
ក្រោយកេីតហេតុភ្លាម ក៏មានកម្មករដូចគ្នាបានប្រញាប់ទៅបិតកុងតាក់ភ្លេីង ដេីម្បីឡេីងជួយសង្គ្រោះ និងទាក់ទៅអាជ្ញាធរមូលដ្ឋាន និងយករថយន្តស្ទួចធុនធំដាក់អង្រិងស្ទួចយកជនរងគ្រោះចុះមកក្រោម ដោយរថយន្តសង្គ្រោះមន្ទីរពេទ្យឯកជនដឹងយកទៅមន្ទីរពេទ្យលោកសង្ឃ (ព្រះកុសុមៈ) ដេីម្បីសង្គ្រោះអាយុជីវិត ៕
ដោយ ៖ ភារ៉ា ដង្កោ
