ភ្នំពេញ៖ លោក នេត្រ ភក្រ្តា រដ្ឋមន្រ្តីក្រសួងព័ត៌មាន ប្រកាសពីការប្រែក្លាយទីភ្នាក់ងារសារព័ត៌មានកម្ពុជា (AKP) ឱ្យទៅជាទីភ្នាក់ងារជាតិឈានមុខ និងជាសម្លេងរបស់រាជរដ្ឋាភិបាលកម្ពុជា ក្នុងឋានៈលោកជារដ្ឋមន្រ្តីក្រសួងព័ត៌មាននៃរាជរដ្ឋាភិបាលអាណត្តិទី៧នេះ។ លោកបន្ដថា ត្រូវធ្វើយ៉ាងណាឱ្យ AKP នេះដើរមុខគេលើប្រព័ន្ធផ្សព្វផ្សាយឯកជនផ្សេងៗនាពេលបច្ចុប្បន្ននេះ។

ក្នុងជំនួបជាមួយថ្នាក់ដឹកនាំ និងមន្រ្តីរាជការអគ្គនាយកដ្ឋានទីភ្នាក់ងារសារព័ត៌មានកម្ពុជា (AKP) នៅព្រឹកថ្ងៃទី៥ កញ្ញា
២០២៣ លោក រដ្ឋមន្រ្តីក្រសួងព័ត៌មាន បានគូសបញ្ជាក់ថា ដើម្បីឱ្យទីភ្នាក់ងារជាតិនេះឈានមុខគេក្នុងប្រព័ន្ធផ្សព្វផ្សាយនោះ លុះត្រាតែត្រូវគិតគូរឡើងវិញលើ
ការងារសរសេរព័ត៌មានឱ្យមានគុណភាព និងមានល្បឿនលឿនជាងនេះ។
លោក បញ្ជាក់ថា ត្រូវខិតខំធ្វើយ៉ាងណាឱ្យទីភ្នាក់ងារជាតិមួយនេះ ក្លាយជាទីភ្នាក់ងារមួយ ដែលប្រព័ន្ធផ្សព្វផ្សាយឯកជនផ្សេងៗយកធ្វើជាប្រភពក្នុងការផ្សព្វផ្សាយទៅកាន់សាធារណជន។
ការកសាងឱ្យមានទំនុកចិត្តគឺជាកិច្ចការ សំខាន់ដែលទីភ្នាក់ងារជាតិមួយនេះត្រូវគិតគូរឡើងវិញដើម្បីទទួលបានប្រភពព័ត៌មានច្រើនពីសំណាក់ស្ថាប័នពាក់ព័ន្ធ ដើម្បីឱ្យទីភ្នាក់ងារជាតិមួយនេះឈានមុខគេលើសមរភូមិផ្សព្វផ្សាយនាពេលបច្ចុប្បន្ននេះ និងទទួលបានប្រភពព័ត៌មានច្រើនយកទៅផ្សព្វផ្សាយ។ នេះគឺជាការ គូសបញ្ជាក់របស់លោករដ្ឋមន្រ្តី។
លោកបានបញ្ជាក់ថា ដើម្បីកសាងនូវទំនុកចិត្តនេះគឺវាទាមទារធ្វើយ៉ាងណាពង្រឹងឱ្យបាននូវគុណភាពព័ត៌មាន ល្បឿនព័ត៌មាន និងការផ្សព្វផ្សាយឱ្យបានទូលំទូលាយ៕ដោយ៖ សំរិត