ខេត្តកំពង់ឆ្នាំង៖ យុវជនម្នាក់បានប្រកាច់ធ្លាក់ពីលើកង់ស្លាប់ភ្លាមៗនៅកន្លែងកើតហេតុបន្ទាប់ពីមានជនសង្ស័យម្នាក់បានជិះម៉ូតូកាន់កាំបិតកាប់ពីក្រោយពេញមួយទំហឹង ។
ហេតុការណ៍ដ៏រន្ធត់នេះបានកើតឡើងនៅវេលាម៉ោង៦និង១៥នាទីល្ងាចថ្ងៃទី០១ ខែកក្កដា ឆ្នាំង២០១៦ នៅលើផ្លូវកៅស៊ូក្រោយរោងចក្រ អឹមវ៉េ ស្ថិតនៅក្នុងភូមិត្រពាំងចឹកសារ សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង ។
ប្រភពពីសមត្ថកិច្ចបានឲ្យដឹងថា ជនរងគ្រោះមានឈ្មោះ អ៊ឹម សៅសុភារា អាយុ២១ឆ្នាំ មុខរបរជាងប៉ះកង់ រស់នៅភូមិស្រែព្រីង សង្កាត់កំពង់ឆ្នាំង ។ ជនរងគ្រោះត្រូវបានគេកាប់ចំកផ្នែកខាងឆ្វេងមុខយ៉ាងជ្រៅជិតដាច់ក ។ ដែលករណីនេះសមត្ថកិច្ចមានការសង្ស័យថា អាចជាករណីគំនុំ ។ នៅពេលនេះសមត្ថកិច្ចកំពុងធ្វើការស្រាវជ្រាវ ដើម្បីចាប់ជនដៃដល់យកមកផ្តន្ទាទោស ។
ប្រភពពីក្រុមគ្រួសារជនរងគ្រោះឲ្យដឹងថា កាលពីថ្ងៃទី៣០ ខែមិថុនា វេលាម៉ោង១២ថ្ងៃត្រង់មានយុវជនម្នាក់បានមកគំរាមនៅកន្លែងប៉ះកង់ថា ហ្អែងប្រយត្ន័ខ្លួនណារ ហើយនៅថ្ងៃទី០១ ខែកក្កដា នេះ នៅវេលាម៉ោង៤សៀលក្នុងពេលដែលជនរងគ្រោះកំពុងតែប៉ះកង់មានគេទូរស័ព្ទមក ហើយជនរងគ្រោះក៏សុំម្តាយដោយប្រាប់ថា ទៅជួបគេនៅក្បែររោងចក្រមួយភ្លែត។ លុះដល់ម៉ោងជាង៦ល្ងាចមានក្មេងប្រុសម្នាក់បានជិះកង់មកប្រាប់ក្រុមគ្រួសារ ជនរងគ្រោះត្រូវបានគេកាប់ស្លាប់ នៅក្បែរោងចក្រ អឹមវ៉េ បាត់ទៅហើយ។
ចំណែកមជ្ឈដ្ឋានខាងក្រៅវិញបាននិយាយថា ករណីនេះអាចជារឿងដែលពាក់ព័ន្ធនិងករណីគ្រឿងញៀន ព្រោះកន្លងមកងជនរងគ្រោះគឺជាមុខសញ្ញានៃការប្រើប្រាស់គ្រឿងញៀនរឿងផលប្រយោជន៍ ៕
ដោយ៖ ចន្ថា
