ភ្នំពេញ៖ តារាសម្តែងស្រីល្បីឈ្មោះខាងបង្ហូរទឹកភ្នែកគឺកញ្ញា នី មុនីនាថ ទទួលបានការសរសើរខ្លាំងពីក្រុមផលិតករថៃថា ជាតារាសម្តែងដែលមានសមត្ថភាពខ្ពស់ក្នុងការសម្តែង។ ទន្ទឹមគ្នានេះនាងក៏ទទួលបានការផ្តល់ឱកាសពីផលិតករថៃដើម្បីថតខ្សែភាពយន្តភាគថ្មីរបស់ទូរទស្សន៍ប៉ុស្ដិ៍លេខ៥គឺរឿង «នាងនាថបាត់ដំបង» ។
លោក ណារ៉ុត ប៊ុនថាំ ប្រធានផលិតភាពយន្តមកពីប្រទេសថៃបានអះអាងថា ខ្សែរឿងថ្មីនេះនឹងត្រូវចេញថតមិនហួសពីអំឡុងខែកក្កដានោះឡើយ ហើយការសម្រេចចិត្តផលិតខ្សែភាពយន្តនេះដោយសារតែប្រវត្តិសាស្រ្តថៃនិងកម្ពុជាសុទ្ធតែមានរឿងព្រេងពាក់ព័ន្ធនឹងនាងនាថដូចគ្នា ទើបខាងផលិតករថៃនិងប៉ុស្ដិ៍លេខ៥សម្រេចផលិតរឿង «នាងនាថបាត់ដំបង» ជាប្រភេទរឿងភាគដើម្បីតម្រូវទីផ្សារទស្សនិកជន។
លោកបន្តថា នៅទីក្រុងបាងកករូបសំណាកនាងនាថត្រូវបានប្រជាជនថៃគោរពមិនខុសពីរូបសំណាកលោកយាយម៉ៅនៅកម្ពុជានោះទេ ហើយដោយយល់ឃើញថា នៅខេត្តបាត់ដំបងក៏មានប្រវត្តិនាងនាថស្រដៀងគ្នានឹងរឿងព្រេងរបស់នាងណាតថៃផង ទើបលោកសម្រេចចិត្តដឹកនាំផលិតរឿងនេះឲ្យមានការដឹងឮតែម្ដង។
ផលិតករខាងលើឲ្យដឹងទៀតថា ខ្លួនជ្រើសយក នី មុន្នីនាថ ធ្វើជាតួឯក ដោយកាលពីថ្ងៃទី១៧ ខែមិថុនា ក៏បានយក នី មុន្នីនាថ ទៅសុំពរជ័យពីម៉ែណាតរបស់ប្រទេសថៃដើម្បីឲ្យការថតរឿង «នាងនាថបាត់ដំបង» ទទួលបានជោគជ័យនោះផង។
លោកបញ្ជាក់ដែរថា តាមគម្រោងខ្សែភាពយន្ន្តនេះគ្រោងបោះទុនច្រើនជាងរឿងមុនៗព្រោះតែរឿង «នាងនាថបាត់ដំបង» ជាប្រភេទរឿងបុរាណដែលត្រូវការចំណាយរៀបចំប្លង់ថ្មីច្រើន។ ក្នុងនោះលោកក៏នឹងធ្វើឲ្យរឿងមួយនេះក្លាយជាប្រភេទរឿងខ្មោចដែលមានឈុតឆាកកំប្លុកកំប្លែងមិនខុសគ្នាពីរឿង «ភីម៉ាត» ដែលជារឿងល្បីល្បាញរបស់ថៃ។
លោក ណារ៉ុត ប៉ុនថាំ បានអះអាងថា ខ្សែរឿងនាងនាថបាត់ដំបងនឹងដាក់ថ្ងៃថតបន្ទាប់ពីរឿង «កូនក្រមុំលោកមេឃុំ» និងរឿង «ហង្សបាក់ស្លាប» ដែលទើបប្រកាសឡើងចេញថតបានយ៉ាងហោច២០ទៅ៣០ភាគរយ។
កញ្ញា នី មុន្នីនាថ បានបង្ហាញអារម្មណ៍ប្លែកចិត្តដែលកញ្ញាគឺជាតារាសម្ដែងឈ្មោះនាថស្រាប់ហើយ ប៉ុន្តែត្រូវបានផលិតករថៃផ្ដល់តំណែងឲ្យសម្ដែងក្នុងរឿងនាងនាថ ដែលជារឿងព្រេងនិទានដ៏ល្បីរបស់ពលរដ្ឋខ្មែរនៅខេត្តបាត់ដំបងនោះទៅទៀត។
នាងបញ្ជាក់ថា នាងពិតជារីករាយក្នុងការទទួលបានតំណែងថ្មីក្នុងខ្សែភាពយន្តភាគរឿង «នាងនាថបាត់ដំបង»។នាងថា ខ្សែភាពយន្តនេះនាងនឹងចេញថតចំនួន៣ខែនៅក្នងទឹកដីខេត្តបាត់ដំបងនិងទីតាំងសំខាន់ៗបែបបុរាណនៅក្នុងប្រទេសកម្ពុជាជាច្រើនកន្លែងទៀតដូចជាខេត្តសៀមរាបជាដើម ដោយតាមគម្រោងគឺរឿងចេញថតនេះគឺផ្ដោតទៅលើប្រវត្តិរបស់នាងនាថ នៅខេត្តបាត់ដំបង របស់ខ្មែរទាំងស្រុងដោយមិនមែនជារឿងប្រភេទនាងណាតនៅក្នុងប្រទេសថៃនោះឡើយ។ កញ្ញាថា ក្រៅពីសុំពរជ័យពីម៉ែណាតរបស់ថៃ កញ្ញាក៏បានបួងសួងសុំពរជ័យពីវិញ្ញាណនាងនាថ នៅខេត្តបាត់ដំបងក្នុងពេលតែមួយផងដែរ។ នាងរំពឹងថា ខ្សែភាពយន្តនេះនឹងទទួលបានការគាំទ្រខ្លាំង ដោយសារតែខ្សែរឿងនេះមានការចាប់អារម្មណ៍រួចហើយក្នុងស្រទាប់មហាជន៕
ដោយ៖ វឌ្ឍនា
