ភ្នំពេញ៖ មានការភ្ញាក់ផ្អើលមួយបានកើតឡើងកាលពីវេលាម៉ោង៨ព្រឹកថ្ងៃទី៨ ខែកក្កដា ឆ្នាំ២០១៦ នៅផ្ទះលក់ទូរស័ព្ទដៃរបស់ឈ្មោះទ្រី សុខជា ស្ថិតនៅបណ្តោយផ្លូវលេខ១៦៣ ផ្ទះលេខ១ សង្កាត់ទួលទំពូងទី១ ខណ្ឌចំការមន បាត់ទូរស័ព្ទដៃជាង១០០គ្រឿង សង្ស័យកម្មករដែលធ្វើសំណង់ថ្មីជាប់នឹងហាងលក់ទូរស័ព្ទដៃនេះចូលគាស់លួច។

លោក ទ្រី សុខជា ម្ចាស់ហាងលក់ទូរស័ព្ទដៃខាងលើបានឲ្យដឹងថា ពេលគាត់មកចាក់សោបើកទ្វារបើកហាងលក់ក៏ស្រាប់តែឃើញបាត់ទូរស័ព្ទអស់ជាង១០០គ្រឿង ប្រភេទម៉ាកIPhone , SumSung , LG ទើបប្រាប់ដល់សមត្ថកិច្ចដើម្បីចុះពិនិត្យ។

ករណីនេះសមត្ថកិច្ចបានហៅមនុស្សជាច្រើននាក់ដែលជាបុគ្គលិកកម្មករផ្ទះធ្វើសំណង់ថ្មី និងម្ចាស់ហាងឈ្មោះទ្រី សុខជា ទៅសាកសួរនៅប៉ុស្តិ៍រដ្ឋបាល ដើម្បីក្តាប់មុខសញ្ញាករណីចោរលួចទូរស័ព្ទអស់ជាច្រើនគ្រឿងនេះ៕

ដោយ៖ ស រស្មី