ខេត្តព្រះវិហារ ៖ ការគិតប្លែកៗ ខ្វះការគិតពិចារណា ក្លាយទៅជាលំនាំគុំគួន យុវជនម្នាក់ ហ៊ានលើកដៃបាញ់សម្លាប់ សាច់ញាតិរបស់ខ្លួនទាំងពីរនាក់ប្ដីប្រពន្ធចោល កើតឡើងដោយគំនុំមួយឆាវ ក្លាយជាជនសង្ស័យឃាតករ អាចជាប់ពន្ធធនាគារអស់មួយជីវិត។
បើយោងតាមសេចក្តីរាយការណ៍បឋមឲ្យដឹងថា : មានជនដៃដល់ម្នាក់ពាក់ពន្ធអំពើឃាតកម្មដ៏សាហា ដែលត្រូវជាក្មួយបានកែច្នៃអាវុធចំនួន២ដើម យកទៅបាញ់ប្រហារជីវិតឪពុកមា និងម្តាយមីងស្លាប់យ៉ាងអាណោចអាធ័ម ដោយសារមានគំនុំសង្ស័យថា ជនរងគ្រោះចេះធ្វើអំពើអាបធ្មប់ ។
ជនសង្ស័យជាឃាតករ ហាក់ដូចមិនខ្លាច ភ័យព្រួយរឿងគុកច្រវ៉ាក់ បុណ្យបាប បន្ទាប់ពីសមត្ថកិច្ចឃាត់ខ្លួន។
តែទោះជាយ៉ាងណាក្តី ជនដៃដល់ជាឃាតករ ត្រូវបានលោកឧត្តសេនីយ៍ទោស្នងការនគរបាលខេត្តព្រះវិហារ បញ្ជារទៅលោកឧត្តមសេនីយ៍ត្រី ស្នងការង ទទួលផែនការងារនគរបាលព្រហ្មទណ្ឌ ឲ្យដឹកនាំកម្លាំងចុះទៅសហការជាមួយលោកអធិការស្រុកសែនជ័យ និងប៉ុស្តិ៍នគរបាលមូលដ្ឋាន ធ្វើការឃាត់ខ្លួនជនសង្ស័យភ្លាមៗ ផងដែរ ។
សមត្ថកិច្ចបានបញ្ជាក់ថា : ជនដៃដល់ឈ្មោះ អាំ ឡាម ភេទប្រុស អាយុ២៩ ឆ្នាំ មុខរបរមិនពិតប្រាកដ ដែលត្រូវជាក្មួយជនរងគ្រោះឈ្មោះ រស់ គឿ ភេទប្រុស អាយុ៦៧ឆ្នាំ (ត្រូវជាឪពុកមា បានបាត់បង់ជីវិត) និងឈ្មោះ មាស រី ភេទស្រី អាយុ៥៩ ឆ្នាំ (ត្រូវជាម្តាយមីងបានបាត់បង់ជីវិត) ។ ជនរងគ្រោះទាំងពីរនាក់ជាប្តីប្រពន្ធ មានមុខរបរជាកសិករ រស់នៅភូមិធ្មា ឃុំធ្មា ស្រុកជ័យសែន ខេត្តព្រះវិហារ ។
សេចក្តីរាយការណ៍បានឲ្យដឹងទៀតថា : កាលពីវេលាម៉ោង៣និង៣០នាទីថ្ងៃទី២៧ ខែ វិច្ឆិកា ឆ្នាំ២០២៣ កន្លងទៅ មានករណីអំពើឃាតកម្មគិតទុកជាមុនមួយ បានកើតឡើងនៅចំណុចបុស្សល្ហុង ជាចំការរបស់ជនរងគ្រោះ ស្ថិតនៅភូមិធ្មា ឃុំធ្មា ស្រុកជ័យសែន ខេត្តព្រះវិហារ ដែលបង្កដោយជនសង្ស័យត្រូវជាក្មួយ បានប្រើប្រាស់អាវុធកែច្នៃចំនួន២ដើម យកទៅបាញ់ប្រហារជីវិតជនរងគ្រោះជាឪពុកមា ត្រូវចំចង្កេះខាងស្តាំធ្លាយទៅខាងឆ្វេង បណ្តាលឲ្យស្លា.ប់នៅនឹងកន្លែងកើតហេតុ ។ បន្ទាប់មកជនសង្ស័យបានស្ទុះទៅដេញតាមបាញ់ប្រហារជីវិតម្តាយមីងម្នាក់ទៀត ត្រូវចំដើមដោះខាងស្តាំធ្លាយទៅក្រោយ បណ្តាលឱ្យស្លាប់ក្នុងចំការទាំងពីរនាក់ប្តីប្រពន្ធ ។ មូលហេតុ ដោយសារជនដៃដល់មានគំនុំថាជនរងគ្រោះចេះអំពើធ្មប់ ។
ក្រោយឃាត់ខ្លួន ជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងខេត្តតាមនីតិវិធី ។
សូមបញ្ជាក់ថា : ការប្រព្រឹត្តបទល្មើស មជ្ឈិម ឧក្រិដ្ឋខ្លះ កើតឡើងដោយការគិតខ្លី ខ្វះការពិចារណា ឬប្រើប្រាស់សារធាតុញៀន ធ្វើឱ្យជនដៃដល់ហ៊ានប្រព្រឹត្ត ។ ជាក់ស្ដែងដូចជាករណីនេះ ឃាតករមិនគួរណាហ៊ានលើកដៃ យកកាំភ្លើងកែច្នៃរហូតដល់ពីដើម បាញ់សម្លាប់ឪពុកមា និងម្ដាយមីង ឱ្យស្លាប់ក្នុងក្លុកឈាម គួរឱ្យរន្ធត់បំផុត។ ជនសង្ស័យ អាចប្រឈមនឹងជាប់ពន្ធនាគារ អស់១ជីវិត ព្រោះជាអំពើឃាតកម្មគិតទុកជាមុន៕
ដោយ : សហការី
