ខេត្តបន្ទាយមានជ័យៈ បុរសម្នាក់រងរបួសធ្ងន់បាក់ត្រកៀក ខណៈក្មេងប្រុសម្នាក់លួចឡើងបើកត្រាក់ទ័រដែល ជ្រកម្លប់ក្បែររ៉ឺម៉កដោយម្ចាស់ទុកមិនបានដកសោ នៅវេលាម៉ោង៣និង៤០នាទីរសៀលថ្ងៃទី២៨ ខែវិច្ឆិកាឆ្នាំ២០២៣ ត្រង់ចំណុចកន្ទួតកោង ខាងត្បូងត្រពាំងវល្លិ៍ប្រេង ខាងកើតដីសហគមន៍កូនខ្លែង ចំងាយប្រហែល៦គីឡូម៉ែត្រ ខាងជើងភូមិព្រះអណ្តូង ឃុំប៉ោយចារ ស្រុកភ្នំស្រុក ។
នគរបាលស្រុកភ្នំស្រុក បានឲ្យដឹងថាៈដំបូងមានឈ្មោះ វុត ឧត្តម ភេទប្រុស អាយុ៣០ឆ្នាំជាម្ចាស់ត្រាក់ទ័រ នៅភូមិគោកសេះ ឃុំភ្នំដី ស្រុកភ្នំស្រុក បានបើកត្រាក់ទ័រដឹកម៉ាស៊ីនទៅច្រូតស្រូវនៅចំណុចកន្ទួតកោង ខាងត្បូងត្រពាំងវល្ល៍ប្រេងខាងជើងភូមិព្រះអណ្តូងចំងាយប្រហែល៦គីឡូម៉ែត្រ ស្ថិតក្នុងភូមិសាស្ត្រភូមិព្រះអណ្តូងឃុំប៉ោយចារស្រុកភ្នំស្រុក ពេលនោះបានដោះក្បាលត្រាក់ទ័រចេញពីរ៉ឺម៉កទៅជួយអូសត្រាក់ទ័រ០១គ្រឿងទៀតដែលជាប់ផុង ពេលជួយអូសត្រាក់ទ័រដែលជាប់ផុងនោះរួច បានបើកត្រាក់ទ័រនោះមកទុកដោយមិនបានដកសោចេញនោះឡើយហើយនាំម៉ាស៊ីនច្រូត ទៅច្រូតស្រូវ ។ មួយសន្ទុះក្រោយមកក៏ស្រាប់មានក្មេងប្រុសម្នាក់ឈ្មោះប្រេត ដូ ភេទ ប្រុស អាយុ ១៣ឆ្នាំ រស់នៅភូមិសាលាដែង ឃុំឬស្សីក្រោក ស្រុកមង្គលបូរី (ក្មេងមានសតិមិនប្រក្រតី)បានលួចឡើងបើកត្រាក់ទ័រយ៉ាងល្បឿនលឿនតាមវាលស្រែ លុះមកកន្លែងទុករ៉ឺម៉កបានជាន់កិនពីលើឈ្មោះ សឺន ធា ភេទប្រុស អាយុ៣១ ឆ្នាំរស់នៅភូមិ កូនខ្លែង ឃុំ ប៉ោយចារ ស្រុកភ្នំស្រុក និងគ្នីគ្នា៧ទៅ៨នាក់ទៀតក្រោយដើររើសគួស្រូវហត់ក៏បានទៅជ្រកម្លប់ក្បែររ៉ឺម៉កត្រាក់ទ័រត្រូវចំត្រកៀកបណ្តាលឲ្យបាក់ត្រកៀកត្រូវបានរថយន្តសង្គ្រោះរបស់មន្ទីពេទ្យបង្អែកស្រុកភ្នំស្រុក ដឹកយកទៅមន្ទីរពេទ្យមិត្តភាព កម្ពុជា ជប៉ុនមង្គលបូរី។
នគរបាលបានបញ្ជាក់ថាៈក្មេងនោះជាមនុស្សមិនសូវគ្រប់មានសតិមិនប្រក្រតីដើរសែងវែងចោលផ្ទះ ក្រោយកើតហេតុពេលសមត្ថកិច្ចសួរនាំក្មេងនោះឆ្លើយថាគេឡើងបើកត្រាក់ទ័រទៅយកទឹកផឹក ៕ដោយ៖វណ្ណា
