ភ្នំពេញៈ នារីរូបស្រស់ម្នាក់ទំនងស្រវឹងស្រា បានបើករថយន្ត ម៉ាកLexus RX 300 មួយគ្រឿងក្នុងល្បឿនយ៉ាងលឿន ហើយរ៉េចង្កូតទៅបុកគំរបលូ បណ្តាលអោយរថយន្តបែកកង់មុខ និងជ្រុលទៅបុកបង្គោលភ្លើងបំភ្លឺផ្លូវ បាក់រាបដល់ដី រីឯរថយន្តបង្ករងការខូចខាតខាងមុខយ៉ាងដំណំ តែសំណាងល្អនារីរូបនោះគ្រាន់តែរងរបួសស្រាល ។ ហេតុការណ៍គ្រោះថ្នាក់ចរាចរណ៍ខាងលើនេះដែរ បានកើតឡើងកាលពីវេលាម៉ោង ១និង៥៥នាទីរំលងអាធ្រាត ឈានចូលថ្ងៃទី ៩ ខែកក្តដា ឆ្នាំ២០១៦ នៅតាមបណ្តោយមហាវិថីសហព័ន្ធ រ៉ុស្សីុ មុខក្រុមហ៊ុនលក់ រថយន្ត LAND ROVER (ក្បែវត្តទឹកថ្លា) ស្ថិតក្នុងសង្កាត់ទឹកថ្លា ខណ្ឌសែនសុខ ។
បើតាមប្រភពព័ត៌មានពីប្រជាពលរដ្ឋដែលឃើញហេតុការណ៍នេះបានឲ្យដឹងថា មុនដំបូងគេឃើញនារីរូបស្រស់ម្នាក់បើករថយន្តមួយគ្រឿងម៉ាក Lexus RX 300 ពណ៍ខ្មៅពាក់ស្លាកលេខភ្នំពេញ2Z-9456 បើកតាមបណ្តោយផ្លូវសហព័ន្ធរ៉ុស្សី ទិសដៅពីលិចទៅកើតក្នុងល្បឿនយ៉ាងលឿន ខណៈមកដល់ចំណុចកើតហេតុ ដោយទំនងជាស្រវឹងស្រាផងនោះ ក៏បានរ៉េចង្កូតមកខាងស្តាំដៃធ្លាក់មកចិញ្ចើមផ្លូវ បុកនិងគំរបលូបង្ហូរទឹក បណ្ដាលឲ្យបែកកង់មុខខាងស្តាំ ហើយដោយសារតែរថយន្តមិនទាន់អស់លឿន ជាហេតុធ្វើអោយនារីម្នាក់នោះ ទប់ចង្កូតមិនរួច ក៏ជ្រុលទៅមុខប្រហែលជាង ២០ម៉ែត្ររថយន្តបានទៅបុកជាមួយនឹងបង្គោលភ្លើងបំភ្លឺផ្លូវបាក់អស់មួយដើមរាបដល់ដី ចំណែកនារីដែលជាអ្នកបើកបរចេញពីក្នុងរថយន្តគ្រាន់តែរងរបួសស្រាលតែប៉ុណ្ណោះ រីឯរថយន្តបង្ករងការខូចខាតខាងមុខយ៉ាងដំណំ ។
ក្រោយពេលកើតហេតុ នារីរងគ្រោះបានទូរស័ព្ទប្អូនប្រុសរបស់នាងអោយមកជួយដឹងនាងទៅកាន់មន្ទីរពេទ្យ ដោយឡែករថយន្តបង្ករត្រូវនគរបាលជំនាញធ្វើការវាស់វែងស្ទួចយករថយន្តទៅរក្សាទុកនៅការិយាល័យចរាចរណ៍ក្រុង ដើម្បីធ្វើការដោះស្រាយ ៕

ដោយ៖ជីម ភារ៉ា ដង្កោ