ភ្នំពេញ៖ កម្លាំងព្រហ្មទណ្ឌនៃអធិការដ្ឋាននគរបាលខណ្ឌទួលគោក ដឹកនាំដោយលោក សុឹម ពិសិដ្ឋ អធិការរងទទួលផែ្នកព្រហ្មទណ្ឌខណ្ឌ បានឃាត់ខ្លួនក្រុមចោរវ័យក្មេង៣នាក់ ក្រោយធ្វើសកម្មភាពកាច់សោ.កម៉ូតូមួយគ្រឿងម៉ាកហុងដា Air Black របស់សន្តិសុខដែលប្រចាំការណ៍នៅក្រុមហ៊ុនឯកជនយីហោ Seven Friendship Security បានសម្រេចហើយព្យាយាមរត់គេចខ្លួន ក៏ត្រូវកម្លាំងល្បាតឃាត់ខ្លួនបានម្នាក់ លុះព្រឹកឡើងឃាត់ខ្លួនបានបក្ខពួក២នាក់ទៀត ។

ហេតុកាណ៍កើតឡើងកាលពីវេលាម៉ោង១២ និង៣០នាទីយប់ ថ្ងៃទី១១ ខែកក្កដា ឆ្នាំ២០១៦ ដែលយាមប្រចាំការនៅតាមផ្ទះល្វែងពេលយប់ នៅចំណុចផ្ទះល្វែង ផ្លូវ២៦១ ភូមិ៤ សង្កាត់បឹងសាឡាង ខណ្ឌទួលគោក រាជធានីភ្នំពេញ ដែល។

ជនរងគ្រោះឈ្មោះ ទិត្យ លឹមហៀង ភេទប្រុស អាយុ២៦ឆ្នាំ មុខរបរសន្តិសុខ(SFS) ស្នាក់នៅផ្ទះលេខ៤៣ ផ្លូវលំ សង្កាត់ព្រៃវែង ខណ្ឌដង្កោ រាជធានីភ្នំពេញ មានស្រុកកំណើតនៅភូមិថ្នល់ទទឹង ឃុំត្បូងឃ្មុំ ស្រុកត្បូងឃ្មុំ ខេត្តកំពង់ចាម បានប្រាប់ថា ខ្លួនធ្លាប់បាត់ម៉ូតូគុបជ្រុងមួយម្តងរួចមកហើយកាលពីខែឧសភា ឆ្នាំ២០១៦ រហូតមកដល់ថ្ងៃទី១០ ខែកក្កដា ឆ្នាំ២០១៦ នៅវេលាម៉ោង៦ល្ងាចគឺជាវេនប្រចាំការនៅម្តុំបឹងសាឡាងរហូតដល់ម៉ោង១២រំលងអាធ្រាត្រចូលថ្ងៃទី១១ ក៏ស្រាប់តែបាត់ម៉ូតូ Air Black ចាស់ ស្លាកលេខ ភ្នំពេញ1T-8740 ដែលទុកនៅតាមផ្លូវក្បែរកន្លែងយាមតែម្តងហើយបានប្តឹងនៅនគរបាលប៉ុស្តិ៍រួចរាល់បន្ទាប់ពីកើតហេតុភ្លាមៗ។

សូមបញ្ជាក់ផងដែរ ក្រុមជនសង្ស័យដែលធ្វើសកម្មភាពលួចកាច់សោ.កម៉ូតូមានគ្នាចំនួន៤នាក់ ហើយត្រូវបាននគរបាលឃាត់ខ្លួនបានចំនួន៣នាក់និងម្នាក់ទៀតរត់គេចខ្លួន។

បច្ចុប្បន្នជនសង្ស័យត្រូវបានឃុំខ្លួនបណ្ដោះអាសន្ននៅអធិការដ្ឋាននគរបាលខណ្ឌទួលគោក ដើម្បីកសាងសំណុំរឿងចាត់ការតាមច្បាប់ ៕

ដោយ៖ ស ដារ៉ា